କବିତା

ଆସ ଆସ ଆମେ ଚିଲିକା ଯିବା

Madhabananda Panda's odia poem for children Aasa Aasa Aame Chilika Jibaa

କେଉଁଦିଗୁ କେତେ ଯାତ୍ରୀଙ୍କି ଧରି
ଧାଇଁଥିବେ ଶତ ସହସ୍ର ତରୀ
ଦଳ ଦଳ ଜଳୁ ହୋଇ ବାହାର
ଶିଶୁମାର କରୁଥିବେ ବିହାର

ଆସ ଆସ ଆମେ ଚିଲିକା ଯିବା

ଆସ ଆସ ଆମେ ଚିଲିକା ଯିବା
ବରକୁଳଠାରେ ଭୋଜି କରିବା
ସେଇଠାରୁ ଆମେ ଟିକଟ କିଣି
ପାୱାର୍ ବୋଟ୍‌ରେ ବସିବା ପୁଣି
କାଳିଜାଈ ଦିଗେ ଚାଲିବ ନାଆ
ବହୁଥିବ ସୁଲୁସୁଲିଆ ବାଆ
ଦିଗନ୍ତ ବିସ୍ତାରି ନୀଳ ତରଙ୍ଗେ
ନାଚୁଥିବେ କେତେ ଜଳ ବିହଙ୍ଗ
ନୀଳ ଜଳ ନୁହେଁ ନୀଳ ଅମୃତ
ସୌନ୍ଦର୍ଯ୍ୟ ରସରେ ପରିପୁରିତ
ଚାରୁ ରୂପମୟୀ ଚିଲିକା ରାଣୀ
ଅନୁଭବି ସିନା ପାରିବ ଜାଣି

କେଉଁଦିଗୁ କେତେ ଯାତ୍ରୀଙ୍କି ଧରି
ଧାଇଁଥିବେ ଶତ ସହସ୍ର ତରୀ
ଦଳ ଦଳ ଜଳୁ ହୋଇ ବାହାର
ଶିଶୁମାର କରୁଥିବେ ବିହାର
ଯୋଗ ଥିଲେ ଆମେ ଦେଖି ପାରିବା
ଜାଈ ଦରଶନ ସାରି ଫେରିବା
ଶୀତ ଆଗମନେ ପ୍ରତି ବରଷ
ବିଦେଶୁ ଆସନ୍ତି ହୋଇ ହରଷ
ଲକ୍ଷ ଲକ୍ଷ ପକ୍ଷୀ ଖାଦ୍ୟ ଲକ୍ଷ୍ୟରେ
ଓହ୍ଲାନ୍ତି ଚିଲିକା ନୀଳ ବକ୍ଷରେ
ପକ୍ଷୀ ନୁହଁ କିବା ଅଟନ୍ତି ପରୀ
ଆସିଛନ୍ତି ଜଳ ବିହାର କରି

ନଳବଣ ପୁରେ କୋଳାହଳରେ
ଚିଲିକା ସୌନ୍ଦର୍ଯ୍ୟ କେ ବର୍ଣ୍ଣିପାରେ ।
ଶୀତ ଅତିକ୍ରାନ୍ତେ ବଢ଼ନ୍ତେ ଖରା
ଫେରନ୍ତି ନିଜର ଘରକୁ ପରା
ମାମୁଁ, ଘଣ୍ଟଶିଳା, ସୋଲରୀ ଦରୀ
ଜଗିଛନ୍ତି ତାକୁ ପ୍ରହରୀ ପରି
କେତେ କବି କେତେ ଭାବୁକ ଆସି
ସୌନ୍ଦର୍ଯ୍ୟ ରସରେ ଯାଆନ୍ତି ରସି
ନାରାୟଣୀ, ଭଗବତୀ ଦର୍ଶନ
ନ ହେଲେ କି ଶାନ୍ତ ହୋଇବ ମନ !
ଚିଲିକାର ସ୍ମୃତି ହୃଦୟେ ହେରି
ନିଜ ନିଜ ସ୍ଥାନେ ଆସିବା ଫେରି ।।

ଲୋକପ୍ରିୟ ଲେଖା

To Top