ବ୍ୟଙ୍ଗଗଳ୍ପ

ଅଜଣା ଲଭ୍ ଲେଟର

Sagaria Abhiram's odia Satire Short Story Ajanaa Labh Letar

ନୋଟ୍ କପି ଫେରାଇଲା ବେଳେ ଶେଖର ଅନ୍ୟ ଏକ କାଗଜରେ “ଆଇ ଲଭ୍ ୟୁ ଠୁ” ଲେଖି, କପି ଭିତରେ ଦେଇଦେଲା ପ୍ରିୟଙ୍କାକୁ

ଅଜଣା ଲଭ୍ ଲେଟର

ୱେଲ୍‌କମ୍ ପାର୍ଟିର ସେ ପ୍ରଥମ ଦେଖାରୁ ହିଁ ପ୍ରିୟଙ୍କା ପ୍ରେମରେ ବାୟା ହୋଇଯାଇଥିଲା ଦେବାଶିଷ୍ । ସମୟ ସହ ତାଳ ଦେଇ ହାଏ, ହାଲୋରୁ ନୋଟ୍ ଦିଆ ନିଆ କରି ସେ ପ୍ରିୟଙ୍କା ହୃଦୟରେ ନିଜର ଏକ ଛବି ବନେଇ ଦେଇଥିଲା । ବର୍ତ୍ତମାନ ସମୟ ଥିଲା ପ୍ରିୟଙ୍କାକୁ ତା ହୃଦୟ କଥା ଜଣେଇବାକୁ । ସେଦିନ ପ୍ରିୟଙ୍କାର ନୋଟ୍ କପି ନେଇଥିଲା ଦେବାଶିଷ୍ । ଫେରେଇଲା ବେଳକୁ ସେଥିରେ ଖଣ୍ଡେ କାଗଜରେ “ଆଇ ଲଭ୍ ୟୁ” ଲେଖି ରଖିଦେଲା । ଭାବିଥିଲା ପ୍ରିୟଙ୍କା ନିଶ୍ଚୟ ପଢିିବ । ହେଲେ ସେହିଦିନ ସଂଧ୍ୟାରେ ଅନ୍ୟ ଏକ ସହପାଠକ ଶେଖର ଆସି ପ୍ରିୟଙ୍କା ଠାରୁ ମାଗିନେଲା ସେହି ନୋଟ୍ କପି । ଘରେ ଯାଇ ଶେଖର ଖାତା ଖୋଲିଲା ଓ ସେଥିରୁ ପାଇଲା ଲଭ୍ ଲେଟର । କ୍ଲାସ୍ ରେ ଅନେକ ଥର ଶେଖରର ଆଖି ପ୍ରିୟଙ୍କାର ଆଖିରେ ମିଶିଯାଇଛି । ଶେଖରର ଜୋକ୍‌ରେ ବହୁତ ହସେ ପ୍ରିୟଙ୍କା । କ୍ଲାସ୍‌ରେ ସୁନ୍ଦରୀ ମାନଙ୍କ ମଧ୍ୟରୁ ପ୍ରିୟଙ୍କା ଅନ୍ୟତମ । ନୋଟ୍ କପି ଫେରାଇଲା ବେଳେ ଶେଖର ଅନ୍ୟ ଏକ କାଗଜରେ “ଆଇ ଲଭ୍ ୟୁ ଠୁ” ଲେଖି, କପି ଭିତରେ ଦେଇଦେଲା ପ୍ରିୟଙ୍କାକୁ । ଦେବାଶିଷ୍ ସନ୍ଦେହରେ ଥାଏ, “କିଛି କହିଲା ନାହିଁ ଯେ ପ୍ରିୟଙ୍କା ?” ଏଣେ ଶେଖରର ଖୁସିର ଠିକଣା ନଥାଏ । ଶେଖର ଭାବୁଥିଲା ସେ ଲଭ୍ ଲେଟର ପ୍ରିୟଙ୍କା ତାକୁ ଦେଇଚି ।

ଦୁଇଦିନ ପରେ ଦେବାଶିଷ୍‌କୁ ପୁଣି ସେହି ନୋଟ୍‌କପି ଦରକାର୍ ପଡିଲା, ମାଗିନେଲା ପ୍ରିୟଙ୍କାଠୁ । ଏଥର ଦେବାଶିଷ୍ ଖାତା ଖୋଲି ଦେଖିଲା ତା ଦେଇଥିବା ଲଭ୍ ଲେଟର ବଦଳରେ ଏକ ଶୁଭ ସନ୍ଦେଶ ଅଛି – “ଆଇ ଲଭ୍ ୟୁ ଠୁ” । ଏଥର ଦେବାଶିଷ୍‌ର ମନ ମଧ୍ୟ ପ୍ରିୟଙ୍କା ପ୍ରେମରେ ଉଡି ବୁଲିଲା । ସେ ଦୁହେଁ, ଦେବାଶିଷ୍ ଓ ଶେଖର ଭାବିନେଲେ ପ୍ରିୟଙ୍କା ତାଙ୍କୁ ବହୁତ ପ୍ରେମ କରୁଚି । ଏବେ କଲେଜରେ ଗୁପ୍‌ଚୁପ୍ ଖୁଆଇବା ଓ ୱାଟ୍ସ୍ଆପ୍‌ରେ ମେସେଜ୍ ପଠାଇବା ଆରମ୍ଭ ହୋଇଯାଇଥିଲା । ପ୍ରିୟଙ୍କା କିନ୍ତୁ ଅଜଣା, ଦୁହିଁଙ୍କୁ କେବଳ ସାଙ୍ଗ ଭାବି ଚାଲିଥିଲା । ହେଲେ ଦେବାଶିଷ୍ ଓ ଶେଖର ଦୁହେଁ ପ୍ରିୟଙ୍କାକୁ ନିଜ ପ୍ରେମିକା ଭାବିନେଇଥିଲେ ।

ଯେତେବେଳେ ପ୍ରିୟଙ୍କା ଦେବାଶିଷ୍‌ ସହ ଗୁପ୍‌ଚୁପ୍‌ ଖାଉଥାଏ, ଶେଖରକୁ ଭାରି ବାଧେ ଏବଂ ଯେତେବେଳେ ପ୍ରିୟଙ୍କା ଶେଖର ସହ ଏକା ବସି ଗପୁଥାଏ ଦେବାଶିଷକୁ ଭାରି ବାଧେ । ଦିନେ ଅସମ୍ଭାଳ ହୋଇ ଦେବାଶିଷ୍‌ ପଚାରିଦେଲା ଶେଖରକୁ ଯେ ସେ କାଇଁ ତା ପ୍ରେମିକା ସହ ମିଳାମିଶା କରୁଚି ? ଶେଖର ଯୁକ୍ତି ବାଢ଼ିଥିଲା ପ୍ରିୟଙ୍କା ତା ପ୍ରେମିକା, ତାକୁ ଆଇ ଲଭ ୟୁ ଲେଟର ଦେଇଛି । ଦେବାଶିଷ୍‌ କହିଲା ପ୍ରିୟଙ୍କା ତାକୁ ମଧ୍ୟ ଆଇ ଲଭ ୟୁ ଠୁ ଲେଖି ପଠାଇଛି । ଦୁହେଁ ପ୍ରେମରେ ପଡ଼ିଯାଇଥିଲେ ସତ ହେଲେ ସେମାନେ ଦୁହେଁ ସାଙ୍ଗ ଥିଲେ । ଯଦି କଲେଜ୍‌ରେ ପଢ଼ିଲା ବେଳେ ପ୍ରେମ କରୁଥାଅ ତେବେ ସିନିୟର ଭାଇ ମାନେ ମତ ଦେଇଛନ୍ତି “ଆଗ ସାଙ୍ଗ, ପଛେ ପ୍ରେମିକା” । ପ୍ରିୟଙ୍କା ସହ କରିଥିବା ହ୍ଵାଟ୍ସଆପ୍‌ ଚାଟିଙ୍ଗ୍‌ ପରସ୍ପର ସହ ଦେଖା ଦେଖି ହୋଇଗଲେ ସାଙ୍ଗ ଦୁହେଁ । ସେମାନେ ବୁଝିଯାଇଥିଲେ ପ୍ରିୟଙ୍କା ତାଙ୍କ ସହ ଡବଲ ଗେମ ଖେଳୁଛି ।

ସେଦିନ ପରଠାରୁ ପ୍ରିୟଙ୍କା ସହ ଗୁପ୍‌ଚୁପ୍‌ ଖାଇବା ଚାଟିଙ୍ଗ୍‌ କରିବା ତ ଦୂରର କଥା, ତା’ ମୁହଁକୁ ବି ଅନାଇଲେ ନାହିଁ ସାଙ୍ଗ ଦୁଇ । ଦେବାଶିଷ୍‌ ଓ ଶେଖରର ଆଚରଣରେ ପରିବର୍ତ୍ତନ ପ୍ରିୟଙ୍କା ବାରି ପାରିଥିଲା । ହେଲେ ସେ ଏ ଲଭ ଲେଟର ଦିଆ ନିଆ ବିଷୟରେ କିଛି ଜାଣି ପାରିନଥିଲା । ସେ ଜାଣିପାରିନଥିଲା ଦୁଇଟା ପୁଅ ତା ପ୍ରେମରେ ପଡ଼ି ବ୍ରେକ୍‌ ଅପ୍‌ ମଧ୍ୟ କରିସାରିଥିଲେ । ହେଲେ ଦେବାଶିଷ୍‌ ଗୁପଚୁପ ନ ଖୁଆଇଲେ କିମ୍ବା ଶେଖର ତା ସହ ଗପ ନ କଲେ ତାକୁ କିଛି ଫରକ ପଡୁ ନ ଥିଲା କାରଣ ତା’ର ତ ଅଲରେଡ଼ି ଗୋଟେ ବଏଫ୍ରେଣ୍ଡ୍‌ ବା ପ୍ରେମିକ ଟେ ଥିଲା ।

ଲୋକପ୍ରିୟ ଲେଖା

To Top