ଅଣୁଗଳ୍ପ

ଅଚିହ୍ନା ଭାଷା – ଶାସ୍ତ୍ରୀୟ ମାନ୍ୟତା

Aravind Das's odia short story Achihnaa Bhashaa - Shaastriya Maanyataa

ଶେଷରେ ତମେମାନେ ଆମ ଭାଷାଟାକୁ ବି ଛାଡିଲନି । ଯଦି ବା କଲ ଲଘୁ ଭାଷା କରିଥାନ୍ତ, ସିଧାସଳଖ ଶାସ୍ତ୍ରୀୟ ଭାଷା କରି ଦେଲ ? କିଏ ଏଇନା ତାକୁ ବୁଝିପାରିବ ?”

ଅଚିହ୍ନା ଭାଷା - ଶାସ୍ତ୍ରୀୟ ମାନ୍ୟତା

“ଶୁଣୁଛ, ଆମ ଓଡିଆ ଭାଷାକୁ ଶାସ୍ତ୍ରୀୟ ମାନ୍ୟତା ମିଳିଗଲା । ଯାହାହେଉ ଭଗବାନ ଆମ ଡାକ ଶୁଣିଲେ । ଅନେକ ଦିନରୁ ଆମେ ଦାବୀ କରିଆସିଥିଲୁ ।

ଆଜି ଆମ ସାହିତ୍ୟ ସଭାରେ ଏହି ବିଷୟରେ ହିଁ ଚର୍ଚ୍ଚା ହେବ ।”

ବର୍ଷୀୟାନ୍‌ ସାହିତ୍ୟିକ ଗବେଷକ ପ୍ରାଣବନ୍ଧୁ ବାବଙ୍କୁ କଥାଶୁଣି ସୋଫାରେ ଲଥ୍‌ କରି ବସିପଡ଼ିଲେ ତାଙ୍କ ଧର୍ମପତ୍ନୀ ସେହ୍ନ ଲତା । ଲୁଗା କାନିରେ ନିଜ ଝାଳୁଆ ମୁହଁଟା ପୋଛି ପକାଉ ପକାଉ ମୁହଁ ଛିଞ୍ଚାଡି କହିଲେ, “ଶେଷରେ ତମେମାନେ ଆମ ଭାଷାଟାକୁ ବି ଛାଡିଲନି । ଯଦି ବା କଲ ଲଘୁ ଭାଷା କରିଥାନ୍ତ, ସିଧାସଳଖ ଶାସ୍ତ୍ରୀୟ ଭାଷା କରି ଦେଲ ? କିଏ ଏଇନା ତାକୁ ବୁଝିପାରିବ ?”

ଆଶ୍ଚର୍ଯ୍ୟ ହୋଇ ପ୍ରାଣବନ୍ଧୁ ବାବୁ ପଚାରିଲେ, “ତମେ କଣ କହୁଚ ମୁଁ ବୁଝି ପାରୁନି?”

“ଲଘୁଭାଷା ପୁଣି କଣ ?”

“ଓହୋ, ଆମକୁ ଏତେ ବୋକା ଭାବନାହିଁ । ରାତି ଦଶଟା ପରେ ନହେଲେ କେଉଁ ବଡନେତା ମରିଗଲେ ଅଲଇଣ୍ଡିଆ ରେଡ଼ିଓରେ ଯେଉଁ କେଁ କେଁ ନହେଲେ ଆ…ଆ… ହୋଇ ଗୀତ ଶୁଭେ ସେସବୁ ଶାସ୍ତ୍ରୀୟ । କିଏ ତାକୁ ଶୁଣେ ?” ସାଧାରଣ ଲୋକେ ସିନେମାଗୀତ ନହେଲେ ଲଘୁ ସଂଗୀତ ଶୁଣନ୍ତି । ଏଇନା ତମେ ସାହିତ୍ୟିକ ଗୋଷ୍ଠୀ ଆମ ଭାଷାକୁ ଶାସ୍ତ୍ରୀୟ କରିଦେଲ ଯେ ଏବେ ଗପ ଗୀତ ବି ବୁଝିଆ ମୁସ୍କିଲ୍ ହୋଇଯିବ ।

ମୃଦୁ ହସି ହସି ପ୍ରାଣବନ୍ଧୁ ସେଠୁ ଉଠିଗଲେ । ବଡପଅୁ ଶୋଭନ୍‌ ଆମେରିକାରୁ ଆସି ପହଞ୍ଚି ଥାଏ । ସଭା ପାଇଁ ତାକୁ ଡାକିବାରୁ ସେ କହଲି ।, “ଓଃ, ଡ୍ୟାଡ଼ି ଆଇ ହାଭ୍‌ ଫରଗଟନ୍‌ ଓଡିଆ, ପ୍ଲିଜ ଲିଭ ମି ।”

ହଠାତ୍ ବୋହୁ ଶୋଭା କହିଉଠିଲା, “ଡ୍ୟାଡି, ଆପଣ ପିଙ୍କୁକୁ ନେଇ ଯାଆନ୍ତୁ । ସେ ପୁରୁଣା ନୂଆ ଓଡିଆ ଗୀତ ବୋଲିବ ଏବଂ ନାଚି ବି ପାରିବ । ଆମେରିକାରେ ଆମ ଓଡ଼ିଆ ସୋସାଇଟିରେ ପ୍ରତି ବର୍ଷ ପ୍ରୋଗ୍ରାମ ଦିଏ ପିଙ୍କୁ ।”

ସେହ୍ନରେ ନାତି ମୁଣ୍ଡକୁ ଆଉଁଷି ପ୍ରାଣବନ୍ଧୁ ଖୁସି ହୋଇ ପଚାରିଲେ, “କେଉଁ କେଉଁ ଓଡ଼ିଆ ଗୀତ ଜାଣଛି ?”

ସରଳ ଭାବରେ ପିଙ୍କୁ କହିଲା, “ଗ୍ରାଣ୍ଡପା, ମମି ସବୁ ଓଡିଆ ଗୀତ ଡାଉନ୍ଲୋଡ୍ କରି ରଖିଛନ୍ତି । ସି.ଡି.ପ୍ଲେୟାର ବାଜିଲେ ମୁଁ ପାଟି ପାକୁପାକୁ କରି ଆକ୍ଟିଂକରି ଗାଇବି ଓ ନାଚିବି ।”

ମୁଣ୍ଡରେ ହାତ ଦେଇ ଏଥର ପ୍ରାଣବନ୍ଧୁ ବାବୁ ସୋଫାରେ ବସି ପଡ଼ିଲେ । ତାଙ୍କୁ ଲାଗିଲା ଶାସ୍ତ୍ରୀୟ ମାନ୍ୟତା ଏକ ଅଚିହ୍ନା ଭାଷାକୁ ମିଳିଛି ।

ଲୋକପ୍ରିୟ ଲେଖା

To Top