କବିତା

ଆଖିରେ ଆଖିରେ

Basanti Das's odia poem Aakhire Aakhire

ସବୁ ସରିସରି ଯେଉଁଦିନ ମୁଁ ଜୁଈରେ ପାଉଁସ ହେବି
ସେତେଦିନ ଯାଏ ତୁମରି ସ୍ମୃତିକୁ ହୃଦୟେ ସାଇତି ଥିବି ।

ଆଖିରେ ଆଖିରେ

ଆଖିରେ ଆଖିରେ ଭରିଦେଲ ତୁମେ ମଧୁମୟ ଅନୁଭବ
ତୁମ ଚାହାଣୀରେ ମୋ ମନ ଭିତରେ କେତେ ମେଳାମଉଛବ,
ଆମ୍ରକୁଂଜେ ଯେବେ ଗାଇଲା କୋଇଲି ମନ ହେଲା ଅାନମନା
କ୍ଷଣେ କ୍ଷଣେ ଛାତି ଛନଛନ ହେଲା ଶୂନ୍ୟହେଲି ତମବିନା ।

ତୁମେ ମୋ ସପନ ତୁମେ ମୋ ଜୀବନ ତୁମେ ମୋ ଦେହର ଛାଇ
ତୁମବିନା ସାଥୀ ଦିନରାତି ମୋର ପାଲଟିଛି ମରୁଭୂଇଁ,
ଶବ୍ଦର ସହରେ ଗଢିଛି ସଂସାର କାବ୍ୟ କବିତାକୁ ନେଇ
ମନରେ ଫୁଟିଲେ ମିଠା ଅନୁରାଗ ସବୁଯାଏ ଗୀତହୋଇ ।

ମୋ ନିରବ ଭାଷା ମୋ ପ୍ରେମର ନିଶା ନିତି ମୋର ସହଚରୀ
ଏକା ବୋଲିଅବା ଭାବିବି କାହିଁକି ଏତେ ମିଠା ସ୍ମୃତି ଧରି ?
ହଜୁଚି ମଜୁଚି ଖୋଜୁଚି ବିପିନେ ସେଇ ସେ ଫଗୁଣ ଫୁଲ
ସଜେଇବା ପାଇଁ ଆଉ ଥରେ ପୁଣି ପୁରୁଣା ଉଜୁଡା ବେଳ ।

ସବୁ ସରିସରି ଯେଉଁଦିନ ମୁଁ ଜୁଈରେ ପାଉଁସ ହେବି
ସେତେଦିନ ଯାଏ ତୁମରି ସ୍ମୃତିକୁ ହୃଦୟେ ସାଇତି ଥିବି ।

1 Comment

1 Comment

  1. ବାସନ୍ତୀ ଦାସ

    ବାସନ୍ତୀ ଦାସ

    December 28, 2017 at 4:45 pm

    ମହାଶୟା , କବିତା ଟି ପ୍ରକାଶ କରିଥିବାରୁ ଅଶେଷ ଧନ୍ୟବାଦ । ୨୦୧୮ ପାଇଁ ଶୁଭକାମନା ।

Leave a Reply

Your email address will not be published. Required fields are marked *

ଲୋକପ୍ରିୟ ଲେଖା

To Top