କବିତା

ଆଶାରେ ନିରାଶା

Namita Manohari's odia poem Aashaare Niraashaa

ପ୍ରାପ୍ତିରେ ଅପ୍ରାପ୍ତି
କ୍ଷଣିକର ତୃପ୍ତି
ଅବ୍ୟକ୍ତ ମନର ଆଶା !
ଫୁଲ ଫୁଟିଯାଏ
ମହକ ନ ଥାଏ
ଆଶାରେ ଭରି ନିରାଶା !

ଆଶାରେ ନିରାଶା

ଘନ ତିମିରର
ବୁକୁ ଚିରି ଦେଇ
ଆଶାର କିରଣ ରଶ୍ମୀ !
ଆକାଶର କୋଳେ
ତାରକାଙ୍କ ମେଳେ
ହସୁଚି ଶରଦ ଶଶୀ !

ନାନା ବାୟା ଗୀତ
ଶୁଣି ଶୋଇଯାଏ
ଅଝଟ ମୋର ଧନଟି !
ରାତ୍ରି ନିସ୍ତବ୍ଧତା
ବଢ଼େ ଉଚ୍ଚାଟତା
ଅନାୟାସେ ଯାଏ ଲୋଟି !

ସ୍ଵପନେ ମଗନ
ହସେ ଘନ ଘନ
ଅବଚେତନ ସେ ମନ !
ଅଭିଳଷିତ ସେ
ଅନ୍ତରର ତୃଷ୍ଣା
ମେଣ୍ଟେ ନାହିଁ କରି ପାନ !

ପ୍ରାପ୍ତିରେ ଅପ୍ରାପ୍ତି
କ୍ଷଣିକର ତୃପ୍ତି
ଅବ୍ୟକ୍ତ ମନର ଆଶା !
ଫୁଲ ଫୁଟିଯାଏ
ମହକ ନ ଥାଏ
ଆଶାରେ ଭରି ନିରାଶା !

ଲିଭି ଲିଭି ଆସେ
ସ୍ୱପ୍ନର ସଳିତା
ଦିକି ଦିକି ହୋଇ ଜଳେ !
ଶୂନ୍ୟତାକୁ ଖାଲି
ଜାବୁଡି ଧରିଲେ
ଅଶାନ୍ତ ବହ୍ନି କୁହୁଳେ ।

ଲୋକପ୍ରିୟ ଲେଖା

To Top