କବିତା

ଆଉ କେତେ ଦିନ …?

Surendra Kumar Behera's odia poem Aau Kete Dina

ଆଉ କେତେଦିନ ?
ଜାତି, ବର୍ଣ୍ଣ, ସଂପ୍ରଦାୟ ଅବା
ଦେଶୀ ବିଦେଶୀର ରଙ୍ଗରେ
ରଞ୍ଚିତ କରି ବନ୍ଧାଯାଉଥିବ
ତୁମ ବଡ଼ଦେଉଳର ଶିଖରରେ
ଧମର ପତିତପାବନ ବାନା ।

ଆଉ କେତେ ଦିନ ...?

ଜଗତର ନାଥ ବୋଲି
ଜଗତରେ ତୁମ ନାମେ
ପଡୁଅଛି ହୁରି ।
ଆଉ କେତେଦିନ ?
ନୀଳାଚଳେ ବସିଥିବ ତୁମେ ।
ଦାରୁଭୂତ ମୌନ ଅବତାରି ?

ନୀରବରେ ଚକାଆଖି ମେଲି
ସେମିତି ଦେଖି ଚାଲୁଥିବ
ଦୁନିଆର ଏ ବଡ଼ଦାଣ୍ଡେ
କେମିତି ଭେଦଭାବର
ଧର୍ମ ଦୌଡ଼ିରେ ଟଣା ହୋଇ ଚାଲୁଛନ୍ତି
ବିବେକ ଓ ମାନବବାତାର
ତୁମର ନନ୍ଦିଘୋଷ ରଥ,
ପ୍ରେମ ଓ ମୈତ୍ରୀର ଦେବଦଳନ
ଆଉ ଶାନ୍ତି, ଅହିଂସା ଓ ଭାତୃତ୍ଵର
ତାଳଧ୍ୱଜ ରଥ ।

ଆଉ କେତେଦିନ ?
ଜାତି, ବର୍ଣ୍ଣ, ସଂପ୍ରଦାୟ ଅବା
ଦେଶୀ ବିଦେଶୀର ରଙ୍ଗରେ
ରଞ୍ଚିତ କରି ବନ୍ଧାଯାଉଥିବ
ତୁମ ବଡ଼ଦେଉଳର ଶିଖରରେ
ଧମର ପତିତପାବନ ବାନା ।

ଆଉ କେତେ ଦିନ ?
ସ୍ପର୍ଶ – ଅସ୍ପର୍ଶ
ପ୍ରବେଶ -ଅପ୍ରବେଶ ଚୋଟରେ
ରକ୍ତରଞ୍ଚିତ କରି ଗଢ଼ା ଚାଲିଥିବ
ବିଶ୍ଵମାନବତାର ତୁମ ବୁନିଆଦି ପରେ
ବିଭେଦତାର ମେଘନାଦ ପାଚେରି ?

ଆଉ କେତେଦିନ?
ଭକ୍ତ ଶିରୋମଣି ଦାସିଆ ବାଉରିମାନେ
ତୁମ ଦର୍ଶନରୁ ବଞ୍ଚିତ ହୋଇ
ପଠାଇ ଚାଲିଥିବେ ତାଙ୍କର
ମହାନ୍‌ ଶ୍ରଦ୍ଧା ଭକ୍ତିର ପବିତ୍ର ନଡ଼ିଆ
ଆଉ ଭକ୍ତ ସାଲବେଗମାନେ ।
ବିଧର୍ମର ବୋଝ ବୋହି ବୋହି
ତୁମ ବଡଦାଣ୍ଡେ ଗାଇ ଚାଲୁଥିବେ
ଆହେ ନୀଳ ଶଇଳ…..,
ଥକାମନ ଚାଲଯିବା
ଚକାନାୟନ ଦେଖିବା….!!

ଲୋକପ୍ରିୟ ଲେଖା

To Top