କବିତା

ଅଗଷ୍ଟ ପନ୍ଦର

Ramakant Mishra's odia poem Agashta Pandara

ସ୍ୱାଧୀନତା ଆମ ଜନ୍ମ ଅଧିକାର
ଏ କଥା ଶୁଣିବାକୁ ଭଲ ଲାଗେ
କିନ୍ତୁ ପରାଧୀନ ନ ହେଲେ
ଏ କଥା ର ମୂଲ୍ୟ ବୁଝା ପଡେ ନାହିଁ

ଅଗଷ୍ଟ ପନ୍ଦର

(୧)

ସବୁ ବର୍ଷ ପନ୍ଦର ଅଗଷ୍ଟ ଆସୁଛି ଆଉ ଚାଲି ଯାଉଛି,
ପନ୍ଦର ଅଗଷ୍ଟର ମହତ୍ୱ ଆଉ ଉପଲବ୍ଧି ହେଉ ନାହିଁ ।

(୨)

ପିଲାମାନେ ଅନ୍ୟ ଉତ୍ସବପରି
ଖଣ୍ଡେ ଖଣ୍ଡେ କାଗଜ ପତାକା ଧରି
କିଛି ସମୟ ପାଇଁ ଆନନ୍ଦିତ ହେଉଛନ୍ତି
କିଛି ସମୟ ପାଇଁ ବନ୍ଦେ ମାତରଂ କହୁଛନ୍ତି
ତା ପରେ ସେ ପତାକାଟିକୁ ଯେଉଁଠି ସେଇଠି
ପକାଇ ଦେଇ ଚାଲି ଯାଉଛନ୍ତି
ତାଙ୍କୁ କିଏ ବୁଝାଇବ ଏହି ତ୍ରିରଙ୍ଗା ପତାକା ପାଇଁ
କେତେ ଲୋକ ସହିଦ ହୋଇଛନ୍ତି ?
କେତେ କେତେ ଲୋକ ପ୍ରାଣବଳୀ
ଦେଇଛନ୍ତି ଅକାତରରେ
ମହାତ୍ମାଙ୍କ ଡ଼ାକରାରେ କେତେ ଲୋକ
ତୁଚ୍ଛ କରିଛନ୍ତି ନିଜ ଜୀବନକୁ ?
ସେ ପିଲାର କି ଦୋଷ ?
ସେ ତ ବୁଝେ ନାହିଁ ଏ ସବୁ କଥା
କିନ୍ତୁ ପରେ ପରେ ଯେଉଁମାନେ
ତଳେ ପଡିଥିବା ସେ ପତାକା ଉପରେ
ପାଦରେ ଦଳିଦେଇ ଚାଲିଯାନ୍ତି ନିର୍ବିଘ୍ନରେ
ସେମାନଙ୍କର ତ ଏ ଦେଶ ପତାକା,
ଏ ଦେଶ ଗୌରବକୁ ସମ୍ମାନ ଜଣାଇବାର ଥିଲା ?

(୩)

ସ୍ୱାଧୀନତା ଆମ ଜନ୍ମ ଅଧିକାର
ଏ କଥା ଶୁଣିବାକୁ ଭଲ ଲାଗେ
କିନ୍ତୁ ପରାଧୀନ ନ ହେଲେ
ଏ କଥା ର ମୂଲ୍ୟ ବୁଝା ପଡେ ନାହିଁ
ଆଜିର ଯୁବ ପିଢ଼ି ପତାକାକୁ
ସମ୍ମାନ ଦେଇ ପାରୁ ନାହାନ୍ତି
କାରଣ ସେ ପତାକା ପଛର
ଇତିହାସ ତାଙ୍କୁ ଜଣା ନାହିଁ
ଜଣା ଥିଲେବି ତା ପ୍ରତି ଯେତିକି
ସମ୍ବେଦନଶୀଳ ହେବା କଥା
ତା ସେମାନେ ହେଉ ନାହାନ୍ତି

(୪)

ଦେଶ ପ୍ରତି ଏବେ ବିପଦ ଘନେଇ
ଆସୁଛି ଅନେକ ଦିଗରୁ
ମାଓବାଦୀ, ଆତଙ୍କତାବାଦୀ , ବିଛିନ୍ନତାବାଦୀ, ସମ୍ପ୍ରଦାୟିକତାବାଦୀ
ମାନଙ୍କର ଳୀଳାଭୁମି ସାଜିଛି ଆମର ଏହି ଭାରତ ଭୂମି ଯାହାକୁ
ଆମେ ଏହି ପନ୍ଦର ଅଗଷ୍ଟ ଦିନ ବନ୍ଦେ ମାତରଂ କହି ତା ପରଦିନ ଭୁଲିଯାଉଛୁ
ଏବେ ଏହି ପନ୍ଦର ଅଗଷ୍ଟ ଏକ ଛୁଟିଦିନ ହୋଇଛି
ଏ ଦିନ ହୋଇଛି ଭୋଜି କରିବାର ଆଉ ବନ୍ଧୁ ମିଳନର
ଆମେ ସବୁ ଭୁଲି ଗଲୁଣି ଏ ଦିନରେ କରିବାକୁ ହେବ ସ୍ମୃତି ଚାରଣ
ସେହି ବୀର ପୁରୁଷ ମାନଙ୍କର ଯେଉଁମାନଙ୍କ ପାଇଁ ଆଜି ଆମେ ସ୍ୱାଧୀନ

(୫)

ଏ ଦେଶକୁ ଏବେ ମାଡି ଆସୁଛି ବିପଦ ଘନ ଘନ
କିଏ ରକ୍ଷା କରିବ ଯଦି ଆଜିର ପିଢ଼ି ଭୁଲିଯିବ ଏହି ଆପଣାର ଦିନ ?
ସମୟ ଆସିଛି ଏବେ ଏ ଦିନରେ ନେବାକୁ ହେବ କେତୋଟି ଶପଥ
ସଭିଙ୍କୁ ବସି ମନ୍ଥନ କରିବାକୁ ହେବ ନିଜ ବିବେକ ଆଉ ବିଚାର
କରିବାକୁ ହେବ ଆମକୁ କି ରୂପରେ ଯୋଗଦାନ
ଯାହା ଦେଶ ପାଇଁ ହେବ ଆମର ଅବଦାନ
ସମୟ ଆସିଛି ଆଜି ପୁଣି ସମସ୍ତଙ୍କୁ ମିଶି
କରିବାକୁ ହେବ ଆଉ ଏକ ମହାନ ବିପ୍ଳବ
ଯେଉଁଥିରେ ତଡ଼ିବାକୁ ହେବ ଏ ଦେଶରୁ ବିଛିନ୍ନତାବାଦୀ ମାନଙ୍କୁ
ଆଉ ସମସ୍ତଙ୍କୁ ହେବାକୁ ହେବ କେବଳ ଭାରତୀୟ

(୬)

ଅତୀତରେ କରିଛୁ ଆମେ ଅନେକ ମହାନ କାମ
ଯାହା ଫଳରେ ଭାରତ ଆଜି ହୋଇଛି ସ୍ୱାଧୀନ ଓ ମହାନ
ଅଛି ଆମ ପାଖେ ଅନେକ ଶକ୍ତି,
ମିଶି ଯଦି ଯିବ ସବୁ ତେବେ
ଏ ଦେଶ ହେବ ବିଶ୍ୱରେ ମହାନ
କେବେଯେ ଆସିବ ସେ ଦିନ ?

ଲୋକପ୍ରିୟ ଲେଖା

To Top