କବିତା

ଦୁଷ୍କର୍ମରେ ଶିକାର ହୋଇଥିବା କୁନି ଝିଅ ଟେ

Duskarmare Shikar Hoithibaa Kuni Jhia Te an odia poem by Dr Kalpana Mallick

ଭଉଣୀଟେ ପରି
କାଲି କାଲି ଚାଲି
ଶିଖିଥିବା କୁନି ଝିଅଟେ
ସବୁ ମଣିଷଙ୍କୁ ଆପଣାର କରିନିଏ

ଦୁଷ୍କର୍ମରେ ଶିକାର ହୋଇଥିବା କୁନି ଝିଅ ଟେ

ଦୁଷ୍କର୍ମ ପରେ ମୃତ୍ୟୁ
ପାଞ୍ଚ ବର୍ଷର ଫ୍ରକ ପିନ୍ଧା
କୁନି ଝିଅଟେ
କେଉଁ କାମାନ୍ଧରେ
ଯୌନ ପିପାଶାରେ
ଦଳି ମକଚି ଚାପି ହୋଇଯାଇଛି
ଗାଁ ପାଖ କିଆବୁଦା ମୂଳେ
ତା କୁନି କୁନି ପାଦ ପାଇଁ
ଆଦରରେ ବାପା କିଣି ଦେଇଥିବା
ପାଉଁଜି ହଳକ ଆଉ ହାତେ ପୁଣି
ଚୁମକି ଲଗା
ପ୍ଲାଷ୍ଟିକ ଚୁଡ଼ି ଦୁଇପଟ
ସେଇମିତି ଚିକମିକ କରୁଥିଲା
କୁନିଝିଅ ଶବଟି ଦେହରେ
ଟିଭିରେ ଦେଖୁଥିଲା ବେଳେ ଲାଗୁଥିଲା
ଆମମାନଙ୍କ କୁନିଝିଅ ପରି
ଅବା କେଉଁ ଭାଇଟିର ଅଲିଅଳୀ
ଭଉଣୀଟେ ପରି
କାଲି କାଲି ଚାଲି
ଶିଖିଥିବା କୁନି ଝିଅଟେ
ସବୁ ମଣିଷଙ୍କୁ ଆପଣାର କରିନିଏ
କାହା କାହା ପିଠିରେ
ଲାଉ ଭଳି ଓହଳି ପଡେ ତ
ଆଉ କାହା କାନ୍ଧପରେ ବସି
ଆକାଶରୁ ଜହ୍ନପାଇଁ ଅଳି କରିବସେ
ତା ନିଷ୍ପାପ ଆଖିରେ
ସବୁ ମଣିଷ ତ ସମାନ ,
ସେ ଜାଣେନା ଭଲ ମନ୍ଦ କିଛି
ଠିକ ସେ ଭଲ ପାଉଥିବା
ତାର ବାପା ଭାଇ ପରି ।।

କୁନି ଝିଅ ବୁଝେ ନାହିଁ
ତା ଫୁଙ୍ଗୁଳା ବୟସରେ ବି
ମୂଲ ଦେବାକୁ ହେବ
ଯୌବନର ଜୀବନର,
କେଉଁ ପିଶାଚର କପଟ
ଫାଶର ପଡ଼ି
ଖଣ୍ଡ ଖଣ୍ଡ ହୋଇଯିବ
ତା କଅଁଳ ଦେହର
ଯେତେ ହାଡ଼ ରକ୍ତ ମାଂସ
ବିଶ୍ୱାସର ବାଲିଘର ସମାଧିସ୍ଥ ହେବ
ଚିର ଦିନ ପାଇଁ ।।

ଏମିତି ଅଜସ୍ର ବେଦନାମାନ
ନିଇତି ନିଇତି ଆସି
ଭାଙ୍ଗି ଦିଏ ମନ
କାହାକୁ ବା ଦୋଷ ଲଦି ହେବ
କାହା ପାଶେ ଗୁହାରୀ କରିବ
ଏ ଦୁଃଖର ସମାଧାନ ପାଇଁ
କହିହେବ ଏଇଠି ବୋଧେ
ଦୋଷ ରହିଗଲା
ୟାକୁ କାଢ଼ି ଫିଙ୍ଗିଦେଲେ
ବଦଳି ଯିବ କୁନି ଝିଅର
ଭାଗ୍ୟ ଭବିଷ୍ୟତ
ସମାଜରେ ଭରିଯିବ
ଅସୀମ ଆନନ୍ଦ
ଏ ଦିନ କ’ଣ ଆସିବନି ଆଉ !!!

ଲୋକପ୍ରିୟ ଲେଖା

To Top