କବିତା

ଏବେ ମୋ ଭରସା ହରି

Sisir Kumar Panda's odia poem Ebe Mon Bharasaa Hari

ବୋହୂ ମାଆ କଥା ଶୁଣିକି ବୁଢ଼ାର
ଆଖି ଲୁହ ଆସେ ଝରି
ଦୀର୍ଘଶ୍ୱାସ ଛାଡ଼ି ହାତ ଟେକି କହେ
ଏବେ ମୋ ଭରସା ହରି ।

ଏବେ ମୋ ଭରସା ହରି

ବୟସ ହେବାରୁ ରୋଗ ମାଡ଼ିଆସେ
କାଶଟା କମୁନି ଯମା
ବୋହୂ ମାଆ କହେ ଔଷଧ ଖାଇକି
ଦିନକ ଭିତରେ କମା ।

ଖୁଁ ଖୁଁ କରି ସାରା ରାତି ତୁମେ
ମିଛଟାରେ କାଶି ହୁଅ
ତୁମକୁ ନକହି ମୋହରି ଉପରେ
ରାଗୁଛନ୍ତି ତୁମ ପୁଅ ।

କେତେଦିନ ଆଉ ତୁମ ଦାଉ ବାପା
ସହୁଥିବୁ ଆମେ ଦୁହେଁ
ଶାନ୍ତିରେ ଟିକିଏ ରହିବାକୁ ଦିଅ
ଆଉ ନୁହେଁ ଆଉ ନୁହେଁ ।

ଇଏ କହୁଥିଲେ ଜରାଶ୍ରମ ଦେଖି
ବାପାଙ୍କୁ ଆସିବା ଛାଡ଼ି
ଧୀରେ ଧୀରେ ତୁମ ଜିନିଷ ସଜାଡ଼
ଗଣ୍ଠିଳି ଭିତରୁ କାଢ଼ି ।

ଏଠିବା କିଏସେ ଦେଖିବ ତୁମକୁ
ସମୟ ଆମର କାହିଁ
ହଇରାଣ କିଆଁ ମିଛଟାରେ ହେବ
ନିଜ ପୁଅବୋହୂ ପାଇଁ ?

ଜରା ନିବାସରେ ତୁମଭଳି କେତେ
ବୁଢ଼ା ମିଳିଯିବେ ସାଥି
ସେଇଠି ବସିକି ଦୁଃଖ ସୁଖ ହେବ
କାଶି କାଶି ସାରା ରାତି ।

ବୋହୂ ମାଆ କଥା ଶୁଣିକି ବୁଢ଼ାର
ଆଖି ଲୁହ ଆସେ ଝରି
ଦୀର୍ଘଶ୍ୱାସ ଛାଡ଼ି ହାତ ଟେକି କହେ
ଏବେ ମୋ ଭରସା ହରି ।

ଲୋକପ୍ରିୟ ଲେଖା

To Top