ଜରା ନିବାସ ଗ୍ରନ୍ଥାଗାରର ବହି ସବୁ ଜୀବନ୍ତ
ସେମାନଙ୍କ ଆଖିରେ ଜ୍ୟୋତି ନାହିଁ
ଜୀବନର ଅନୁଭୂତି ତାଙ୍କ ଆଖିରୁ ବାରି ହେଉଛି
ଆଖି ସବୁ ଛୋଟ ଛୋଟ, ପେଜୁଆ, ପାଣି ପୂର୍ଣ୍ଣ
ଭଲ କରି ଦେଖା ନ ଯାଉ ଥିଲେ ବି
ସବୁ କିଛି ଦେଖି ନବାର ପ୍ରଲୋଭନ
ହାତ ବଢ଼ାଇ ସବୁ କିଛି ଜାଣି ବାର ଆଗ୍ରହ ।

କଥା ହେଲେ ଜଣେ ଜଣେ ଜରା ନିବାସୀ ସହିତ
ମିଳି ଯିବ ଅନେକ ଉପନ୍ୟାସ ଲେଖିବାର ସୂତ୍ର
ଅନୁଭୁତିର ବେଦନାରେ ସିକ୍ତ ହେବ କେତେ ଚରିତ୍ର
ସବୁ କିଛି ଲେଖି ହେବ ନାହିଁ ଚେଷ୍ଟା କରି ମଧ୍ୟ
ଲେଖିଦେଲେ କୋହ ସମ୍ଭାଳି ହେବ ନାହିଁ ।

ଯଦି ଉପନ୍ୟାସ ପାଠ କରିବାର ଆଗ୍ରହ ଥାଏ
ଯଦି ଲେଖା ଲେଖି କରିବାର ଆଗ୍ରହ ଥାଏ
ଥରେ ଯାଇ ଜରା ନିବାସର ପ୍ରତି ଏକ ଚରିତ୍ରର
ଅନୁଶୀଳନ କର, ସମବ୍ୟଥିତ ହୋଇ ଶ୍ରବଣ କର
ମିଳି ଯିବ ଚିରନ୍ତନ ଲେଖନୀର ଆଧାର ।