କବିତା

ଜେଜେ ବାହାରିଲେ ବଜାର କରି

Paramita Mishra's odia poem Jeje Baahaarile Bajaara Kari

ଗାଁଟା ଯାକ ଭାରି ଅଳିଆ
ସହରଟା କାଳେ ଭାରି ବଢ଼ିଆ ।

ଜେଜେ ବାହାରିଲେ ବଜାର କରି

ଅସୁମାରି ସ୍ୱପ୍ନ ଆଖିରେ ଧରି
ଜେଜେ ବାହାରିଲେ ବଜାର କରି ।

ଗାଁଟା ଯାକ ଭାରି ଅଳିଆ
ସହରଟା କାଳେ ଭାରି ବଢ଼ିଆ ।

ନାକକୁ ଫୁଲେଇ ମୁହଁକୁ ମୋଡ଼ି
କହୁଥିଲା ଆମ ସୁନ୍ଦରୀ ବୁଢ଼ୀ ।

ବୁଢ଼ୀ ମନ ହେଲାଣି ସୁକୁସୁକୁ
ଦୀପାବଳିରେ ଯିବ ନାତି ପାଖକୁ ।

ସକାଳୁ ମତେ କହିଛି ଆଜି
ବଜାରୁ ଆଣିବ ସଉଦା ଭାଜି ।

କାକରା, ଆରିଷା, ମଣ୍ଡା ଗଢ଼ିବ
ମାଛ ସାକରାକୁ ନାନା ଦରବ ।

ନୂଆ ଶାଢ଼ୀ ଆଉ ଧୋତି ସାଙ୍ଗକୁ
ମୁଆଁ ଧରି ଯିବ ପୁଅ ପାଖକୁ ।

ପାନପାଖ ପାଟିରୁ ଲାଳ ଗଡ଼ିପଡୁଛି
ତଥାପି ବୁଢ଼ୀ ଲାଗିପଡ଼ିଛି ।

ରାତି ଯାକ ଆଉ ହଉନି ନିଦ
ଜଗିଛି କେବେ ରାତି ପାହିବ ।

ସଅଳ ଉଠି ହେଲା ତିଆରି
ଚାଲ ଯିବା ଏବେ ଯିବା ସହର
ଆମ ପୁଅର ଘର ।

ବାହାରିଲୁ ଏଥର ଆମେ ବୁଢ଼ାବୁଢ଼ୀ
ପୁଅ ଏଡ଼େବଡ଼ ଘର କରିଛି
ଗାଁରେ କାଇଁ ମୁଁ ପଡ଼ିରହିଛି ।

ଗୁଲୁଗୁଲିଆ ମୋ ନାତି ଟୋକାଟା
ତା’ ସାଙ୍ଗେ ଖେଳି କଟିଯିବ ଦିନଟା ।

ତୁମ କଥା ଏବେ ସେତିକି ଥାଉ
ପୁଅ ଘର ଦାଣ୍ଡ ଚୌକିଦାର
କହିଲା ଏ ଡାକ୍ତର ବାବୁଙ୍କ ଘର ।

ବାହାରୁ ବାହାରୁ ଘଉଡ଼ି ଦେଲା
କହିଲା ବାବୁଙ୍କ ଦୁଆରେ ତାଲା ।

ମୁହଁକୁ ଫୁଲାଇ ଠେଙ୍ଗା ଦେଖେଇ
କହିଲା କୋଉଠୁ ଆସନ୍ତି ଧାଇଁ ।

ମଳି ମୁଣ୍ଡିଆ କଉଠିକାର
ବାପା ମା’ କାଳେ ଆମ ବାବୁଙ୍କର ।

ଆଜି ଯାଏଁ ତମେ ଥେଲ କୋଉଠି
କେବେ ତ ତୁମକୁ ଦେଖିନି ଏଠି ।

ମୋ ବୁଢ଼ୀର ଆଉ ବଳ ପାଉନି
ରାସ୍ତା ଉପରେ ସେ ଟଳିଗଲାଣି ।

ବୁଢ଼ୀ ମୁହଁ ଦେଖିପାରିଲି ନାହିଁ ।
ସଖୀ ଏତେ ସପନକୁ ଆମ ରାତି ନାହିଁ ।

ପୁଅ ବୋହୂ ଘରେ ଚାବି ପକେଇ
ଗଲେଣି ବିଦେଶ ଛୁଟି କଟେଇ ।

ବୁଢ଼ୀର ମୁହଁ ଆଉ ଦିଶୁନି ଭଲ
ଚାଲ ସଖୀ ଏବେ ଗାଁକୁ ଚାଲ ।

କେତେ ନାତି ନାତୁଣି ଆମର
କେତେ ପୁଅ ବୋହୂ ଆମ ଗାଁର ।

ସମସ୍ତଙ୍କ ପାଖକୁ ଚାଲ ଫେରିଯିବା
ପୁଣି ଦିପାବଳୀ ଆମ ଗାଁରେ ପାଳିବା ।

ଟିକେ ହସିଦେ ମୋ ସୁନ୍ଦରୀ ବୁଢ଼ୀ
ପୁଣି ଯିବା ଚାଲ ବଜାର କରି
ଚାଲ ଯିବା ଆମ ଘର ବାହୁଡ଼ି ।।

ଲୋକପ୍ରିୟ ଲେଖା

To Top