କବିତା

କେନ୍ଦ୍ରାପଡ଼ାରୁ ସାତଭାୟା ଯିବା ରାସ୍ତାରେ

Dr Dilip Kumar Swain's odia poem Kendrapadaru Saatabhaayaa Jibaa Raastaare

ଏଠି ଲୁହରେ ସୂର୍ଯ୍ୟାସ୍ତ ହୁଅ ପ୍ରତିଦିନ
ବିପଯ୍ୟାର ବଂଶୀ ବାଜେ ଦିଗ୍‌ବଳୟରୁ
କ୍ରମଶଃ ଛେଉଣ୍ଡ ହୁଏ ଗୋଟେ ସବୁଜ ଗାଆଁ
ଯନ୍ତ୍ରଣାର ଯମଦୂତ ସାଜି
ସମୁଦ୍ର ଭିଡ଼ିନିଏ ସମସ୍ତଙ୍କୁ
କାଳ କାଳ , ସାରା କାଳ
ଲୁହ ଥମ ଥମ ଦିଶିଲେ
କବି ବିଜୟ ବଳ ।

କେନ୍ଦ୍ରାପଡ଼ାରୁ ସାତଭାୟା ଯିବା ରାସ୍ତାରେ

ସରୋଜ, ଅତୁଲ ବଳ, ଅରବିନ୍ଦ ଓ ବିଜୟ ବଳ
ଆମେ ଦିନେ ବୁଲି ବାହାରିଲୁ ସମୁଦ୍ର କୂଳ
ଆଉ କେଉଁଠିକ ନୁହଁ
ସ୍ୱପ୍ନର ସାତଭାୟା
ଏକ ଲୁପ୍ତମାଣ ଐତିହର କଙ୍କାଳ ।

ସରୋଜ ସମାଜସେବୀ , ସଙ୍ଗଠକ
ଅତୁଲ ବନଫୁଲର ସଂପାଦକ
ଅରବିନ୍ଦ ଗୋରୀ ଗପର ଗାଳ୍ପିକ
ବିଜୟ ବଳ କବି
ମୁଁ ତୁଛା ପର୍ଯ୍ୟଟକ ।

ଏଠି ଓଦାଲୁଗା ପିନ୍ଧି
ସୌନ୍ଦଯ୍ୟ ଲହଡ଼ି ଭାଙ୍ଗେ
ହେନ୍ତାଳ ବଣର ଓଦା ଉତ୍ତରୀରେ
କାଶୀ ,ବନ , ରାଇଗଛର ସୁଗନ୍ଧି
ଦେହସାରା ଛନ୍ଦି ହୁଏ ସରୀସୃପୀୟ ମୌନତା
ନିରୁତା ପ୍ରେମିକଟେ ପାଇଲେ
କାମିନୀ ନଈ କୁମ୍ଭୀର ପାଲଟି ଯାଏ
ପ୍ରେମ ହୁଏ ରକ୍ତମୟ
କହିଲେ ବନ ଫୁଲର ସମ୍ପାଦକ ।

ଅନେକ ଶିକ୍ଷିତ ଓ ସୁନ୍ଦରୀ ଝିଅ
ସଂପର୍କ ହୀନ ନିର୍ଜନତାରେ
ହୁଅନ୍ତି ଭିତର କନିକାର ‘ଗୋରୀ ‘ କୁମ୍ଭୀର
ନୀଳ ଜଙ୍ଗଲ ଘେରା
ଏ ଲବଣାକ୍ତ ଲବଙ୍ଗ ଦ୍ଵୀପରେ
ନୀଳ ନିର୍ଜନମୟୀ ଗୋରୀ ଗୀତ ଗାଏ
ପୁରୁଷର ଯୌନଦମ୍ଭ ଭାଙ୍ଗିଯାଏ
ଯୌନ ନିର୍ଜନ ଗୋରୀମାନେ କୁମ୍ଭିରିଣୀ ପାଲଟି ଯାଆନ୍ତି
ଯୋଡ଼ିଲେ ଗାଳ୍ପିକ ଅରବିନ୍ଦ ଧଳ ।

କଥା ସେଠି ନାହିଁ ବନ୍ଧୁ
ସାତଭାୟା ଯିବା ରାସ୍ତାରେ ତମେ ଭେଟିବ
ଅନେକ ରାଜନୈତିକ ଛଳନାର ବାଲିଘର
କେବେ ବଗପଟିଆତ ଓକିଲପାଳ
ସବୁଠୁ ପ୍ରତାରଣାର ପୋଷ୍ଟର ।
ସମୁଦ୍ର ମଝିରେ ଶୋକ ସଭାରେ ବସିଛନ୍ତି ଛଅ ଭାଇ
କୁଟା ଖିଅରେ ଅଟକିଛି
ଶେଷତମ ଭାଇର କଙ୍କାଳ
କ୍ରୋଧରେ କହିଲେ ସରୋଜ ବାବୁ
ଧେତ, ସବୁ ଶଳା ଚୋର ।

ରାତି ପାହିଲା ବେଳକୁ ଏଠି
କିଶୋରୀ ଝିଅର କାନି ଟାଣିନିଏ କୁମ୍ଭୀର
ଭାତଆଟିକା ଭାସେ ବଙ୍ଗୋପସାଗରରେ
ଦେଇପିଣ୍ଡିରେ ଲହଡ଼ା ମାରେ ସମୁଦ୍ର
କୋଳପୁଅ ବାଲିରେ ଖେଳୁ ଖେଳୁ
ଖସିଯାଏ ସମୁଦ୍ର କୂଳକୁ ।

ଏଠି ଲୁହରେ ସୂର୍ଯ୍ୟାସ୍ତ ହୁଅ ପ୍ରତିଦିନ
ବିପଯ୍ୟାର ବଂଶୀ ବାଜେ ଦିଗ୍‌ବଳୟରୁ
କ୍ରମଶଃ ଛେଉଣ୍ଡ ହୁଏ ଗୋଟେ ସବୁଜ ଗାଆଁ
ଯନ୍ତ୍ରଣାର ଯମଦୂତ ସାଜି
ସମୁଦ୍ର ଭିଡ଼ିନିଏ ସମସ୍ତଙ୍କୁ
କାଳ କାଳ , ସାରା କାଳ
ଲୁହ ଥମ ଥମ ଦିଶିଲେ
କବି ବିଜୟ ବଳ ।

ଏବେ ଭାବୁଚି
ଆଉ ଯିବା କଣ ଠିକ ହେବ?
ମୁଁ ତୁଛା ପଯ୍ୟଟକ
ମୋତେ ଯଦି ପଚାରି ଦିଏ
ପଞ୍ଚୁବରାହୀ ମନ୍ଦିର ତଳେ ବସିଥିବା ବୁଢ଼ୀ
ହାତୀ , ଘୋଡ଼ା
ଘରବାଡ଼ି ଦେବୁ କହିଥିଲୁ ପରା
କଣ ଦେଖିବାକୁ ଆସିଚୁରେ
ତୋତେ କିମ୍ଭୀର ଖାଉରେ ସବାଖିଆ
ମୋ ଯିବା କଣ ଠିକ୍‌ ହେବ ?

ମୋ ଆଗରେ ଏକ ବିଖୁବ୍ଧ ସମୁଦ୍ର
ରକ୍ତନଦୀର ସଇରାତ
କୁମ୍ଭୀର ପିଠିରେ ବସିଚି ଗୋଟିଏ ନିରୀହ ଗାଆଁ
ଜଳସମାଧୀ ନେବ ଏ ମାଟି ଚାଖଣ୍ଡ
ଖସିପଡୁଚି କାଦୁଅ ଭିତରକୁ ମୁଁ
ପହଁରା ଶିଖି ନ ଥିବା ମୁଁ ଏକ
ନିରପରାଧୀ ସାତଭାୟା ।

ଓଃ ! ମୋତେ ଯିବାକୁ ହେବ ।

ଲୋକପ୍ରିୟ ଲେଖା

To Top