କବିତା

ମିଛ ପାର୍ବଣ

Surendra Kumar Behera's odia poem Micha Paarbana

ବଧ କରିଦେଲ, କବ ଦିବ୍ୟ ଅସ୍ତ୍ରଶସ୍ତ୍ର
ଆଉ କରାଳ ତ୍ରିଶୂଳର ଯାଦୁରେ
ଅହଙ୍କାରୀ, ଦୁରାଚାରୀ, ପାପୀ,
ଭ୍ରଷ୍ଟାଚାରୀ ଚଣ୍ଡ ମୁଣ୍ଡ, ଶୁମ୍ଭ ନିଶୁମ୍ଭ

ମିଛ ପାର୍ବଣ

ସତ୍ୟ ଯୁଗେ କୁଆଡ଼େ
ଦେବତାଙ୍କ ସମ୍ମିଳିତ ତେଜର
ଜ୍ୱଳନରେ ଅଗ୍ନିଗର୍ଭା ହୋଇ
ବନିଗଲ ତୁମେ ……
ମହାମାୟା ମୁକ୍ତିର ସଳିତା,
ଶକ୍ତି ସ୍ୱରୂପିଣୀ, ସିଂହବାହିନୀ,
ଦୁର୍ଗତିନାଶିନୀ ମା’ ଦୁର୍ଗା !

ବଧ କରିଦେଲ, କବ ଦିବ୍ୟ ଅସ୍ତ୍ରଶସ୍ତ୍ର
ଆଉ କରାଳ ତ୍ରିଶୂଳର ଯାଦୁରେ
ଅହଙ୍କାରୀ, ଦୁରାଚାରୀ, ପାପୀ,
ଭ୍ରଷ୍ଟାଚାରୀ ଚଣ୍ଡ ମୁଣ୍ଡ, ଶୁମ୍ଭ ନିଶୁମ୍ଭ
ଆଉ ବ୍ରହ୍ମାବରେ ମହାବଳୀୟାନ
ମହିଷାସୁରକୁ, ତବ ଅପରୂପା ଯୌବନର
ସ୍ଥାପତ୍ୟରେ ବିମୋହିତ କରି ;
ଯୁଗ ଯୁଗ ପାଇଁ ରକ୍ଷା କରି ଦେଲ
କୋଉ ଦେବତାଙ୍କ ହିନୀମାନା ।

ରାମଚନ୍ଦ୍ର କୁଆଡ଼େ, ତ୍ରେତୟାରେ
ତବ ଅପାର କରୁଣାରେ….
ମନ୍ତ୍ରମୁଗ୍ଧ ହୋଇ ନାଶ କରିଦେଲେ
ରାବଣ, କୁମ୍ଭକର୍ଣ୍ଣ, ଇନ୍ଦ୍ରଜିତ
ଆଉ ଯେତେ ସବୁ ଦୈତ୍ୟଗଣ
ପର ସ୍ତ୍ରୀ ହରଣ କରିବାର କରୁଣ
ପରିଣତି ଇତିହାସ ରଚିଦେବା ପାଇଁ ।

ଦ୍ୱାପରରେ ତୁମେ ……
ପରମ ପ୍ରତାପୀ ଦୁରାଚାରୀ କଂସକୁ
ଶ୍ରବଣ କରାଇ ଦେଇଥିଲ
ତା’ର ସୁନିଶ୍ଚିତ ମୃତ୍ୟୁର ଚରମବାଣୀ,
କିନ୍ତୁ, କାହିଁ, …. କାହିଁ ଏ କଳିଯୁଗେ
ତମର ସେ ଅପାର ଶକ୍ତିର ଝଙ୍କାର
ଅନନ୍ତ କରୁଣାର ବାରିଧାରା,
ଆଉ ଅପ୍ରମିତ ମମତାର ମହାପାରାବାର !

କରାଳ କଳୁଷ ଭର୍ତ୍ତି ଏ ବିଶ୍ୱରେ
ଚାଲୁଅଛି ତବ ନାମେ ନିତି
ଦଶରାରେ ମିଛ ପାର୍ବଣର ମହାପଟୁଆର ! !

ଦେଖ ମା’, ତବ ନୀଳ ଚକ୍ଷୁର ଦୁ୍ୟତିରେ
ଘଣ୍ଟ ମର୍ଦ୍ଧଳର ବିଧୂନିତ ବୁକୁ ଚିରି
କିପରି ଘେରିଛନ୍ତି, ରତ୍ନଖଚିତ
ତବ ପୂଜାମଣ୍ଡପକୁ, ଷଡ଼ ରିପୁର
ଏ ଯୁଗର ଶତସହସ୍ର ଶୁମ୍ଭ ନିଶୁମ୍ଭମାନଙ୍କୁ
ପ୍ରଚଣ୍ଡ ଅହଙ୍କାରର ଚଣ୍ଡ ମୁଣ୍ଡଙ୍କୁ,
ଆଉ ପାପୀ ଦୁରାଚାରୀ ମହିଷାସୁର
ଓ ରାବଣମାନଙ୍କୁ, ସ୍ୱାର୍ଥକୁ ନୈବେଦ୍ୟକରି
ଐଷ୍ଟିକ ଉପଚାରରେ ଆବାହନ କରି ଚାଲିଛନ୍ତି
ମଦ, ମାଂସ ଆଉ ନାରୀର ନିଶାରେ
ମସଗୁଲ୍ ହୋଇ, ଲଭିବାକୁ
ଏ ସସାଗରା ଧରାର ସକଳ ଐଶ୍ୱର୍ଯ୍ୟ ।

ପାରିବନି ମା’ ତୁମେ, ପାରିବନି…..
କରାଳ ତ୍ରିଶୂଳରେ ତବ
ଆମର୍ଷ ଏ ଦୁର୍ବାର ମଣିଷଙ୍କୁ ବଧକରି
ଦେବ ଦାନବ ଠୁ ତ ଏମାନେ ମହାଭୟଙ୍କରୀ !
ମାଟିର ଦୁର୍ଗା ତୁମେ, ଯୁଗ ଫୁଗ ତ କୋଉ
ମଣିଷର ସୁପରିକଳ୍ପିତ ମନଗଢ଼ା କଥା
ପାରିବନି, ମିଛ ପାର୍ବଣର ଏ ଆସୁରିକ
ଆତ୍ମମ୍ଭରିତାକୁ ନାଶ କରି ! !

ଲୋକପ୍ରିୟ ଲେଖା

To Top