କବିତା

ମୁଁ ଯେ ଦିଗହଜା ମରୁନଈ

Jayashree Dash's Odia Poem MUN JE DIGAHARAA MARUNAI

ମୁଗ୍ଧ ବିଭୋର ତନୁ ମନ ମୋର
ମିଶି ବି ସାଗର ବୁକେ ଯାଇ,
ହେଲେ ମୁଁ ଜାଣିଛି ବୃଥା ମୋ ସପନ
ମୁଁ ଯେ ଦିଗହଜା ମରୁନଈ !

ମୁଁ ଯେ ଦିଗହଜା ମରୁନଈ

ନୀଳ ସାଗରର ତରଙ୍ଗମାଳା ଗୋ
ଅଧିରରେ ଆଉ ଡାକ ନାହିଁ,
ଧିରେ ଧିରେ ପଥ ହୁଡ଼ି ମୁଁ ଯାଉଛି
ହଜି ଯାଉଛି ମୋ ତନୁ କାହିଁ ?

ଗୁରୁ ଗମ୍ଭୀର ସଙ୍ଗୀତରେ ତୁମ
ମତୁଆଲା ହୋଇ ଆସେ ଧାଇଁ,
ଅତିକ୍ରମି କେତେ ବନ୍ଧୁର ପଥ
କେତେ ଦୁର୍ଗମ ମରୁଭୂମି ?

ମୁଗ୍ଧ ବିଭୋର ତନୁ ମନ ମୋର
ମିଶି ବି ସାଗର ବୁକେ ଯାଇ,
ହେଲେ ମୁଁ ଜାଣିଛି ବୃଥା ମୋ ସପନ
ମୁଁ ଯେ ଦିଗହଜା ମରୁନଈ !

କ୍ଷୀଣ ହୋଇ ଆସେ ତନୁ ମୋର ଯେବେ
ଶୁଖିଶୁଖି ଆସେ ଝର ମୋର,
କଳ୍ପନା ବିଳାସୀ ମନ ମୋର ଦେଖେ
ସପନ ମଧୁର ମିଳନର ।

ଯଦିବା ଜାଣିଛି କଳ୍ପନାରେ ଖାଲି
ହଜିବି ତୁମରି କୋଳେ ଯାଇ,
ବାଜିବନି କେବେ ମିଳନର ବଂଶୀ
ମୁଁ ଯେ ଦିଗହଜା ମରୁନଈ !

ଲୋକପ୍ରିୟ ଲେଖା

To Top