କବିତା

ନୂଆ ବୋହୂର ପିଠା ତିଆରି

Ajaya Mahala's odia poem Nuaa Bohura Pithaa Tiaari

କେଉଁଠି ସବୁଜ
କେଉଁଠି ନିବୁଜ
ଧୂଆଁ ପରି ବୁଲେ ମନର ବ୍ୟଥା

ନୂଆ ବୋହୂର ପିଠା ତିଆରି

କିଏ ଆମ ଘର
କିଏ ତୁମ ଘର
ସବୁରି ଘରର ଗୋଟିଏ କଥା

କେବେ ଏଠି ସୁଖ
କେବେ ଏଠି ଦୁଃଖ
କେବେ ବି ଜୁଆର କେବେ ବି ଭଟ୍ଟା

ବିଧାତା ଗଢଣୀ
ନଇଁଛି ଓଢଣୀ
ସ୍ୱପ୍ନ ଅଞ୍ଜନା ଅପରିଚିତା

ଏଇ ଚମ୍ପା କଢ଼
ଆଙ୍ଗୁଳିରେ ଗଢ଼
ସ୍ପର୍ଶ ମନ୍ତ୍ରିତ ଆରିସା ପିଠା

ଏଣେ ଶାଶୁ ମାଆ
ତେଣେ ବଡ଼ ଯାଆ
ଚିପି ଚିପି କୁହ ଅନ୍ତର କଥା

କେଉଁଠି ସବୁଜ
କେଉଁଠି ନିବୁଜ
ଧୂଆଁ ପରି ବୁଲେ ମନର ବ୍ୟଥା

ବିଧବା ପିଉସୀ
ଦେଉଛି ଆଉଁସି
ଖାଲି ଖାଲି ହାତ ଲଙ୍ଗଳା ମଥା

ଏହି ଘର ଝିଅ
ବଂଶ ସୁତା ଖିଅ
ଗେହ୍ଲା ହେଲା ଆଜି ଅଭିଶପ୍ତା

ଆଣି ଅଛି ବାକି
ପୁରା ଗଲା ସରି
ନାଇଁ ଆସିଲାଣି ନୟନ ପତା

ଏଡ଼େ ଅବିବେକୀ
କେହି କହିବେ କି
ଚାଖ କହ ପିଠା କେତିକି ମିଠା

ହେ ସ୍ନେହ ଆରାଧ୍ୟା
ଏହି ତ ଅଯୋଧ୍ୟା
ମୁଁ ଯେ ତୁମ ରାମ ତୁମେ ମୋ ସୀତା

କେବେ ଖୁସି ହସ
କେବେ ବନବାସ
ମୁଁ ପ୍ରେମ ଶପଥ ତୁମେ ମୋ ଗୀତା

ଭାଙ୍ଗି ଛାଇ ନିଦ
ଖୋଲି ଆଖି ମୁଦ
ଆଲୁଅରେ ଲିଭାଇ କହିବ କଥା

ଗହିଲିଣି ଶହେ
ଚିଡ଼ିଲିଣି ବହେ
ସବୁ ଚେଷ୍ଟା ମୋର ହେଲାଣି ବୃଥା

ଖେଳ ଥିବା ବାକି
ଆୟୁ ଯିବ ସରି
ସେ ଗାଁଆ ଏନ୍ତୁଡ଼ି ଏ ଗାଁଆ ଚିତା

ଆଣ ଥିବ ବାକି
ପୁର ଯିବ ସରି
ନଇଁ ଯାଇଥିବ ନୟନ ପତା

ଲୋକପ୍ରିୟ ଲେଖା

To Top