କବିତା

ପଳାତକ

Dr Mousumi Parida's Odia poem Palaataka

ଖାଲି କିଛି ସମୟ ବାକି !
ପାଣିର ସ୍ରୋତରେ ଭଉଁରି ପଡିବାକୁ
ବେଶୀ ଡେରି ନାହିଁ !

ପଳାତକ

ଜୀବନକୁ ଜିତିବା ବାଜିଟା
ପରାଜିତ ହେଲାପରେ..
ସ୍ୱପ୍ନସବୁ ବିଭାଜିତ ଅସଂଖ୍ୟ ଭାଗରେ !

ତେବେ ବି ସେ ନୃଶଂସ ଆଖି ଖୋଜେ
କିଛି ଦୁର୍ବଳ ଅଂଶ ପୁଣି ଯୋଉଠୁ କଣା କରି
ପହଂଚିହେବ ହୃଦୟରେ !

ସେଇଠୁ ଆରଂଭହେବ ଅତୀତର ଧାରା !
ମଣିଷ ପାଲଟିଯିବ ଛେଳି..
ସମର୍ପିଦେବ ବେକକୁ..
ଚାପଡରେ କାଟିବାକୁ ନହେଲେ
ମାଳା କରି ବେକରେ ଲମ୍ବେଇବାକୁ ।

ଜାଣିନ ବୋଧେ, ଛେଳି ଆଜିକାଲି
ଜଙ୍ଗଲରେ ବାଘ ପାଲଟିଛି !
ଶିକାରୀକୁ ପରାଜିତ କରିବାକୁ
ତା ପଞ୍ଝାକୁ ଶକ୍ତ କରିଛି !

ତାକୁ ବି ନିଜ ସୁରକ୍ଷା ନିଜେ କରିବାକୁ ହେବ ।
ମଥା ଉପର ଆକାଶରେ
ଘଡଘଡି ପରି ଚମକାଇ ଦେବାକୁ ହେବ
ଅବା ଭୂମିକମ୍ପ ହୋଇ ପାଦତଳୁ
ମାଟି ଘୋଷାରି ନେବାକୁ ପଡିବ !

କହିବାକୁ ହେବ ଛେଳିମାନେ ବି
ରୋକିପାରନ୍ତି କଂସେଇ ହାତକୁ ।

ଖାଲି କିଛି ସମୟ ବାକି !
ପାଣିର ସ୍ରୋତରେ ଭଉଁରି ପଡିବାକୁ
ବେଶୀ ଡେରି ନାହିଁ !

ଲୋକପ୍ରିୟ ଲେଖା

To Top