କବିତା

ସନ୍ଥ ଅରକ୍ଷିତ

ଟଙ୍କତୋରାଣି-କଂସିଏ କାଞ୍ଜିପାଣି
ବେଙ୍ଗମୂତରେ ଗୋଳିଆ ହେଇଯାଏ
ଅଣ୍ଟାଭାଙ୍ଗି ଚାଲୁଥିବା ଗୋବରୀ ନଈ
ଯା-ଆସ କରେ ଛପନା କୋଟି ଜୀବ

ସନ୍ଥ ଅରକ୍ଷିତ

ଏଇ ମାତ୍ର ଆଠଅଣା ଗଞ୍ଜେଇରେ
ମିଳିଯାଏ ମୋ ବୋଉର ହଜିଲା ଗାଈ
ଯମ ହାତରୁ ଖସିଆସେ ସତିଆ ମା’ର ମଲାପୁଅ
ଅରକ୍ଷିତର ଚିଲମ୍ ଧୂଆଁରେ
ଡାକମାରିଲେ ଯିଏ “ଓ’ କରେ
ସିଏ ପୋଡ଼ପିଠା ପରି ମୁଣ୍ଡିଏ ପାହାଡ଼
ଟଙ୍କତୋରାଣି-କଂସିଏ କାଞ୍ଜିପାଣି
ବେଙ୍ଗମୂତରେ ଗୋଳିଆ ହେଇଯାଏ
ଅଣ୍ଟାଭାଙ୍ଗି ଚାଲୁଥିବା ଗୋବରୀ ନଈ
ଯା-ଆସ କରେ ଛପନା କୋଟି ଜୀବ
ଜଳ-ସ୍ଥଳ-ପୃଥିବୀ-ଆକାଶ-ଆଇଁଷ
ମହମହ ଶୁଖୁଆ ବେଶରରେ ବ୍ରହ୍ମ ଅବଧୂତ ଶୂନ୍ୟବାସ
ଛି’ କରିଦେଲା ସିଂହାସନ
ରାଜଉଆସ-ଏସି ରୁମ୍
ମାର୍ବଲ ଚଟାଣ-ବାଇଆମାଳିର ଫୁଲ ବଗିଚା
ପଥରଖୋଲରେ ଗଣାପୋଛା ହେଲା
କଟା-ସମ୍ପା-ସମ୍ପତି
ବାହ୍ମ୍ରଣୀ ବୁଢ଼ୀର କଦଳୀପତ୍ରରେ
ତିଆରି ହେଲା ଜାତକ-ଜେତବନ
ପୋଛି ହେଇଗଲା ବଳଭଦ୍ର ଦେବ

ଈଶ୍ୱର-ଅରକ୍ଷିତ
ଗୋ ମାଂସରେ ତିଆରି ହେଲା
ମହମହ ମହାପ୍ରସାଦ-ମିର୍ଜା ସାହେବ
କଂସା ଆଉଟାରେ ମେଣ୍ଟେଇଲା ଶୋଷ
ପିଣ୍ଡରେ ବିଶ୍ୱବ୍ରହ୍ମାଣ୍ଡ ଚଉଦ ଭୂବନ
ଶୂନ୍ୟରୁ ସାଉଁଟିଲା ଗୀତା ମହୀମଣ୍ଡଳ
ଜିଇଁବାର ତତ୍ତ୍ୱ ମନ୍ତ୍ରସାର
ସର୍ବଧର୍ମ ସମନ୍ୱୟ ଶ୍ରମଣ-ଶ୍ରାବସ୍ତୀ ଶ୍ରୀକ୍ଷେତ୍ର
ଯେଉଁ ପୀଠରୁ ପିଠାଖାଇ ଲେଖିଥିଲା “ଆନନ୍ଦ ମଠ”
ବଙ୍କିମ ଚନ୍ଦ୍ର-ବନ୍ଦେ ମାତରମ୍ ଜାତୀୟସଙ୍ଗୀତ
ସେହି ପୀଠରେ ମପାଚାଲିଛି ଯାତ୍ରା ମଣ୍ଡପ
ନକ୍ସା ଗାରରେ ନଟକିଚି-ଯାଜପୁର-କଟକ
ମଖମଲ ମାରର୍ବଲରେ ମହକି ଉଠୁଚି ମନ୍ଦିର
ମହନ୍ତ ମହାରାଜ-ଗୁମ୍ଫା ଏସି-ରୁମ୍
ଏବେ ଏଠି
ସମସ୍ତେ ସନ୍ଥ ସନ୍ନ୍ୟାସ ସନାତନ
ସୁରକ୍ଷିତ ଶିକ୍ଷିତ-ତାମସିକ
ଚାରଣମାନଙ୍କ ଚାପରେ
ଚୁପ୍‌ଚାପ୍ ବ୍ରହ୍ମଅଧୂତ
ସାତ୍ତ୍ୱିକ ସନ୍ଥ ଅରକ୍ଷିତ ।

ଲୋକପ୍ରିୟ ଲେଖା

To Top