କବିତା

ଶବ୍ଦ ଶିକାର

Chandrakanta Behera's odia poem Shabda Shikaar

ପରିପକ୍ୱ ଶବ୍ଦମାନଙ୍କୁ
ଉଡ଼ିଯିବା ସମୟରେ ହିଁ ଶିରବିଦ୍ଧ କରି
ଖସେଇ ଦେବା କାଗଜ ଛାତିରେ …
କୌଶଳରେ ଖସିଯାଉଥିବା
ଶବ୍ଦମାନଙ୍କ ପାଇଁ
ଜାଲଟେ ବାନ୍ଧିବା ସ୍ୱପ୍ନର ଦିଗରେ ।

ଶବ୍ଦ ଶିକାର

ତୁଣୀରେ କାଳି ଭର୍ତ୍ତି କରି
କଲମର ଧନୁ ଧରି
ଆସ ଯିବା, ଆଜି ରାତିରେ
ଶବ୍ଦ ଶିକାରରେ ।

ପରିପକ୍ୱ ଶବ୍ଦମାନଙ୍କୁ
ଉଡ଼ିଯିବା ସମୟରେ ହିଁ ଶିରବିଦ୍ଧ କରି
ଖସେଇ ଦେବା କାଗଜ ଛାତିରେ …
କୌଶଳରେ ଖସିଯାଉଥିବା
ଶବ୍ଦମାନଙ୍କ ପାଇଁ
ଜାଲଟେ ବାନ୍ଧିବା ସ୍ୱପ୍ନର ଦିଗରେ ।

ମୁଖାଟେ ପିନ୍ଧିବା
ଖୁବ ନିୟନ୍ତ୍ରଣରେ ଦର ଚିହ୍ନା ଶବ୍ଦର
ଆଖିକୁ ଫିଙ୍ଗିବା ତୀକ୍ଷ୍ଣ ଅସ୍ତ୍ରଟେ ।
ଫାଶଟେ ବାନ୍ଧି, ଉପରେ ତମ
ପାଉଁଜିର ଶବ୍ଦ ଆଉ ଓଠର ଲାଳିମାର
ଛଦ୍ମ ମଲାଟଟେ ନାଇ
ଅପେକ୍ଷା କରିବା… ସେ ଶବ୍ଦ ସବୁକୁ ।

ଶେଷରେ
ଆହତ ନିହତ ଶବ୍ଦ ମାନଙ୍କୁ ନେଇ
ଫେରି ଆସିବା ଘରକୁ ।

ଲୋକପ୍ରିୟ ଲେଖା

To Top