କବିତା

ଉଜୁଡାପଣ

Dr Mousumi Parida's Odia poem Ujudaapana

କିଛି ଅଯଥା କୋଳାହଳରୁ
ମୁହଁ ଫେରାଇ ଅନୁଭବ କଲି..
କୋଳହଳର ତୀକ୍ଷ୍ଣ ଛୁରିକା
ଲମ୍ବିଯାଇଥିଲା ମୋ ଗଳାଯାଏଁ..!

ଉଜୁଡାପଣ

କିଛି ଅସାଡପଣକୁ ସମୁଦ୍ରରେ ବିସର୍ଜି ଆସିଲି..
ହେଲେ ସମୁଦ୍ର କାଳେ ସବୁ ଫେରାଇଦିଏ ।

କିଛି ଅଯଥା କୋଳାହଳରୁ
ମୁହଁ ଫେରାଇ ଅନୁଭବ କଲି..
କୋଳହଳର ତୀକ୍ଷ୍ଣ ଛୁରିକା
ଲମ୍ବିଯାଇଥିଲା ମୋ ଗଳାଯାଏଁ..!

ଏଇ ଯେ ରକ୍ତ ଝରୁଛି ଗଳାରୁ..!

କଣ୍ଟକିତ ରାସ୍ତାରୁ ପାଦ ହଟାଇ
ଯେତେବାର ହାତେ ମାପି ଚାଖଣ୍ଡେ ଚାଲିଲି
କ୍ଷତ ଓ ଯନ୍ତ୍ରଣାରେ ଭରିଗଲି ।

ଯାହା ଦେଲି ଫେରି ପାଇଲିନି..
ଯାହା ପାଇଲି ତା ମୋ କର୍ମଫଳ ନଥିଲା !

ଫିଙ୍ଗିଦେଲି ସରଳତାର ଆଭରଣ..
ନିରବତାର ନିଷ୍ପାପ ପୃଥିବୀରୁ
ମୁକୁଳି ଯେବେଠୁ ପରଖିଲି ଦୁନିଆକୁ..
ସେବେଠୁ ଜାଣିଲି
ଶୁଭେଚ୍ଛୁଙ୍କ ଭିଡରେ ଏଠି ଅଜସ୍ର ଶତ୍ରୁ..!

ହସୁଥିବା ଲୋକଙ୍କ ମେଳରେ
କେତେସବୁ ରକ୍ତପିପାସୁ !

ସତେ କି ଚାହିଁବସିଛନ୍ତି
ପାଦତଳେ ମଥିବାକୁ ଅସ୍ତିତ୍ୱ
କହିବାକୁ ମନ୍ଦିରରେ ଦେବତାମାନେ ବି
ଏବେ ବନ୍ଦୀ ଆମ ଈଶାରାରେ !

ସେବେଠୁ ନୀରବତା ହିଁ ସାଥୀ, ସାଧନା ହିଁ କର୍ମ… !

ସେଇ ସେ ମାଛର ଆଖି..
ଲକ୍ଷ୍ୟର ଚରମ ସୋପାନ !

ପ୍ରାପ୍ତିର ପାହାଚ ଚଢିବାକୁ
ଭାବନାକୁ ବିସର୍ଜି ଆସିବାକୁ ହେବ !

 

 

ଲୋକପ୍ରିୟ ଲେଖା

To Top