କି ଗାର ଟାଣୁଚ, କବି ନିରଞ୍ଜନ ?
ଗାରେଇ ଗାରେଇ ଆଙ୍କିଦେଲଣି ଚିତ୍ରଘର
ଜହ୍ନରେ କିଣି ଦେଲଣି ଜାଗା
ଘର ଅଗଣାରେ ବୁଲିଗଲାଣି ପାଚେରୀ ।

କି ଗାର ଶିଖେଇ ଦେଲେ ବିପ୍ରବାବୁ, କେଜାଣି
ସାରା ଲଣ୍ଡନଙ୍କୁ ଗାରଉଚନ୍ତି ପ୍ରଫୁଲ ମହାନ୍ତି
ମଡ଼ର୍ଣ୍ଣ ଆର୍ଟରେ
ସିଏ ଏବେ ପ୍ରସିଦ୍ଧ ଶିଳ୍ପୀ, ପ୍ରଖ୍ୟାତ ଲେଖକ
ଏମିତି ତ କବିତା ଲେଖି ଲେଖି
ସୁବ୍ରତ ଦାସ ହଜେଇ ଦେଇଛି
ତା’ ହୃଦୟର ଆରଖଣ୍ଡକ
କରଣି ଗାରରେ ଛୋଟ ହେଇଗଲା ଯେ
ରଜାପୁଅ ହରେଇଲା ଅନେଶୋତ ଦାମ୍ପତ୍ୟ
ମୂର୍ଚ୍ଛି ଦେଲା ଉଷୁମ ଓଠର ଲାଳିତ୍ ।

ଦଲିଲର ଧାପେ ଗାରରେ
ନାଆଣ ବୁଢ଼ା ପୋଛିଦେଲା
ବଡ଼ଭାଇ ଗୋବିନ୍ଦର ସବୁ ଜମିବାଡ଼ି
ବିଧବା ଶୁକୁଟିମା ଗାଉଚି ଯୋଗୀଗୀତ
ଝିଅମାନେ ବଜଉଚନ୍ତି କେନ୍ଦରା ।

ଗାର ଡେଇଁଗଲେ ଭୋଗିବାକୁ ହେବ
ବନବାସ ଚଉଦ ବରଷ
ନିଆଁରେ ପୋଡ଼ି, ମାଟିରେ ହଜିଲେ ବି
ଲିଭିବ ନାହିଁ ଅସତୀର କଳଙ୍କ ।