ଲେଖକ ଜଣେ ଯଶସ୍ୱୀ ଓ ଅଗ୍ରଣୀ କଥାକାର ଭାବରେ ଅନେକ ସାରସ୍ୱତ ସମ୍ମାନର ଅଧିକାରୀ ହୋଇପାରିଛନ୍ତି । ବିଭିନ୍ନ ସମୟରେ ତାଙ୍କର ଗଳ୍ପ ଅନ୍ତର୍ଭୁକ୍ତ ହୋଇଅଛି ମାଟ୍ରିକ୍ ଠାରୁ ଏମ.ଏ. (ଓଡ଼ିଆ) ପାଠ୍ୟକ୍ରମରେ । କଥାବସ୍ତୁରେ ନୂତନତା, ପରିବେଷଣରେ ନାଟକୀୟତା ଓ ଭାଷାରେ କାବ୍ୟିକତା ତାଙ୍କ ଗଳ୍ପକୁ ଦିଏ ଗାମ୍ଭୀର୍ଯ୍ୟ ଓ ଭାବୋଦ୍ଦିପକତା । ଏକ ସାଧାରଣ ଘଟଣାକୁ ନିରୀକ୍ଷଣ କରନ୍ତି ଦାର୍ଶନିକର ଅନ୍ତର୍ଦୁଷ୍ଟିରେ ଏବଂ ଏହା ରୂପାନ୍ତରତ ହୋଇଯାଏ ଅସାମାନ୍ୟ ଓ ଅସାଧାରଣ ଗଳ୍ପରେ । ଏହାର ଆବେଦନ ପାଠକଙ୍କୁ ପରିଚିତ କରାଏ ସୃଷ୍ଟି ଓ ଜୀବନର ଚିରନ୍ତନ ଏବଂ ସାର୍ବଜନିନ ସତ୍ୟ ସହିତ । ଏକ ଅସଜଡ଼ା, ନିରାସକ୍ତ ଓ ହିଂସ୍ର ପରିବେଶରେ ଗଳ୍ପର ଚରିତ୍ରମାନେ ନିଃସଙ୍ଗ ଓ ତିଷ୍ଠି ରହିବା ପାଇଁ ସଂଘର୍ଷରତ । ଏମାନଙ୍କ ପ୍ରତି ଗାଳ୍ପିକଙ୍କର ଅନୁକମ୍ପା ଓ ସମ୍ମାନ ତଥା ଜୀବନର ଶକ୍ତି ଉପରେ ପ୍ରଗାଢ଼ ଆସ୍ଥା ।