ମନୋଜ ଦାସ

ଉପକୂଳବର୍ତ୍ତୀ ଗୋଟିଏ ଗ୍ରାମରେ ୧୯୩୪ରେ ମନୋଜ ଦାସଙ୍କର ଜନ୍ମ । କିଶୋର କାଳରୁ ସାହିତ୍ୟ ଓ ସମ୍ପାଦନାରେ ମନୋନିବେଶ । ବିପ୍ଳବୀ ଛାତ୍ରନେତାରୂପେ କାରାବରଣ (୧୯୫୫), ବାନ୍ଦୁଂ ଆଫ୍ରୋଏସିଆ ଛାତ୍ର ସମ୍ମିଳନୀ (୧୯୬୫)ରେ ବିଶେଷ ଅଂଗ୍ରହଣ । ଦିଗନ୍ତ (୧୯୫୦-୫୧ ଏବଂ ୧୯୫୯-୬୩)ର ସମ୍ପାଦନା । କଟକସ୍ଥ ଖ୍ରୀଷ୍ଟ କଲେଜରେ ଅଧ୍ୟାପନା (୧୯୫୯-୬୩) ପରେ ପଣ୍ଡିଚେରୀ ପ୍ରସ୍ଥାନ ଏବଂ ଶ୍ରୀ ଅରବିନ୍ଦ ଆନ୍ତର୍ଜାତିକ ଶିକ୍ଷାୟତନରେ ଇଂରାଜୀ ସାହିତ୍ୟ ଅଧ୍ୟାପନା । ବିଖ୍ୟାତ ଇଂରାଜୀ ମାସିକ ଦି ହେରିଟେଜ୍‌ର ସମ୍ପାଦନା (୧୯୮୫-୮୯) । କେନ୍ଦ୍ର ସାହିତ୍ୟ ଏକାଡେ଼ମି ସମ୍ମାନ ଲାଭରେ ପ୍ରଥମ ଓଡ଼ିଆ ଗାଳ୍ପିକ (୧୯୭୨) ଏବଂ ଶାରଳା ପୁରସ୍କାର ପ୍ରାପ୍ତିରେ ଦ୍ୱିତୀୟ ସାହିତ୍ୟିକ (୧୯୮୦) । ପଦ୍ମଶ୍ରୀ ସମ୍ମାନ ଓ ସରସ୍ୱତୀ ସମ୍ମାନ (୨୦୦୧), ସାହିତ୍ୟ ଭାରତୀ ସମ୍ମାନ ଏବଂ ସାରଳା ସମ୍ମାନରେ (୨୦୦୬) ବିଭୂଷିତ ।