କେଉଁଠୁ ଆସିଛି କେଜାଣି
ଜ୍ଜ୍ୱଳନ୍ତ ଅଗ୍ନିପିଣ୍ଡରେ ଦଗ୍ଧିଭୂତ
ପାଉଁଶରୁ ବାରମ୍ୱାର ଜୀବନ୍ୟାସ ।

ଆଖିରୁ ପ୍ରଲମ୍ୱିତ
ଅସୁମାରୀ ତାରା ବ୍ୟାପି
ସ୍ୱପ୍ନର ଆକାଶରୁ ପାହାଡ଼ର
ଏ ଜଙ୍ଗଲ ବେଶ
ଗ୍ରହରୁ ନକ୍ଷତ୍ର ସଞ୍ଚରିଯାଇଚି
ଇନ୍ଦ୍ରଜାଲ, ଏ ଭୋକ ।

ଛାତି, ପେଟ, ମୁଣ୍ଡ
ସାରା ଅବୟବକୁ ଗ୍ରାସ କରିଛି
ଏହି ଅଦୃଶ୍ୟ ଶୋଷ
ଅଣଚାଶ ପବନର ବାହାପରି
ଲମ୍ୱାଇଚି ଲମ୍ୱାହାତ
ଜରାୟୁରୁ ଜୁଇଯାଏ
ସ୍ୱପ୍ନରୁ ବାସ୍ତବ ଯାଏ
ଅଶେଷ ଏ ଭୋକର ସମାବେଶ ।

ନିଶ୍ୱାସର ତତଲା ଭୋକରେ
ଶୋଷିନିଏ ସବୁ କମ୍ପନ
ସ୍ୱପ୍ନସବୁ ଏକାକାର ହୁଏ
ବିନ୍ଦୁଏ ଆଲିଙ୍ଗନରେ ଶୁଖିଯାଏ
ମୁହୂର୍ତ୍ତାଏ କାମନା
ଥମିଯାଏ ଭୋକଶୋଷର ଆତ୍ମାହୂତି
ଆମେରିକାର ପଦେ ଆଶ୍ୱାସନାରେ ।