କହିବାକୁ ପଡ଼ିବନି
ଭଲ ଅଭିନୟ କରିପାର ବୋଲି
ଅଜଣାତରେ ତମ ଅସ୍ପଷ୍ଟ ଅଭିବ୍ୟକ୍ତିର
କେଉଁ ଫାଙ୍କରୁ ଝରି ପଡ଼ୁଥିବା
ଛଳନାର ମିଠା ମିଠା କଥା କହିଦିଏ
ତମେ କେଉଁଠି ପଡିଯାଇଛ ବନ୍ଧା ।

କଥା ଛୁରିରେ ତମେ
ସମୟକୁ କରିପାର କାବୁ
କେମିତି କହିହେବ କେଉଁ ଭାଷାରେ
ବେଦନା ଜର୍ଜର କ୍ଷତାକ୍ତ ହୃଦୟର ଅନ୍ଦିସନ୍ଧି
ଜଗି ବସେ ତମ ବାଟ
ସଙ୍ଖୋଳେ ଭିଜା ଆଖିରେ
ନିରୁଦ୍ଧିଷ୍ଟ ତମ ମନର ଗୋପନ ଅଭିସାରକୁ ।

ପ୍ରତି ରାତିରେ ନାଗରୀ ସାଜି
ଆଖିରେ କଜଳ କିମିଆଁ ମାଖି
ଦେହରୁ ନିକଟ
ମନରୁ କାହିଁ କେତେ ଦୂର
ତମ ଇଚ୍ଛାର ପରିଚିତ କେଉଁ ନିର୍ଭର ଜାଗାରେ
ନିଜକୁ ଥାପିଛ ତମେ ହିଁ କହିବ ।