ଏସନ ହଡ଼ବଡ଼େଇଗଲା
ଓଳାଶୁଣୀ ମେଳା, ମାଓବାଦୀଙ୍କ ବିଜ୍ଞାପନରେ
ଡରି ଡରି ଆସିଲେ ଦୋକାନୀ
ଥରି ଥରି ଘୂରାଫେରା କଲେ
ଦେଖଣାହାରି,
ସଅଳ ସଅଳ ସରିଗଲା ମେଳା ।

ଝୋଳଲଗା ଖଲିପତ୍ରକୁ ଟଣାଟଣି କରି
କାଉମାନେ ହାଲିଆ
ଘୁମଉଛନ୍ତି ୟୁକାଲପଟାସ ଡାଳରେ
ଖଣ୍ଡିଆ ବରାଟା କଷିଦେଉଚି
କୁକୁରଙ୍କ ମର୍ଦ୍ଦାଙ୍ଗି
ଦଲକାଏ ପବନରେ ଉଡ଼ିଆସୁଛି
ଅଇଁଠାପତ୍ର, ପଲିଥିନ୍
ଚିରା ଟୁକୁରା ଯାତ୍ରା ଟିକଟ,
ଛନ୍ଦି ଦେଉଛନ୍ତି ପାଦ ।

ସନ୍ତେଇ ଉଠିଚି ବାରକଡ଼
ଭଣକିନା ଭାସିଆସୁଚି ମୁତୁରାଗନ୍ଧ
ଛଲକାଏ ପବନରେ
ମେଳା ଭାଙ୍ଗିଯାଇଛି ବୋଲି
ମିଠା ଦୋକାନ ମାଟିରେ
ମାଛିଙ୍କ ଭଣ ଭଣ ଉଡ଼ାଣ ।