ସତରେ !
ଏଇ ସେଇ ଅଳକା
ଯିଏ ଦେଖିଛି
କେତେ ହୃଦୟର ସ୍ପନ୍ଦନ
ଅଗଣିତ ପ୍ରେମର ଅପାସୋରା
ସ୍ମୃତିର ଛାପ ରଖିଛି ଧରି
ତା’ ଅବଲୁପ୍ତ ଏଇ ବାଲୁକା ରାଶିରେ …
ସତରେ !
ଏଇ ସେଇ ଅଳକା
ଆଜି ବି ରହିଛି
ମୁକସାକ୍ଷୀ ହୋଇ
ବହୁ ପ୍ରେମୀଙ୍କର ମହାର୍ଘ ମୁହୂର୍ତ୍ତର
କେତେ ସ୍ୱପ୍ନ ଏବେ ବି ଫେଣେଇ ଉଠୁଛି
ତା’ର ଏଇ ପାଣି ପବନରେ ….
ସତରେ !
ଏଇ ସେଇ ଅଳକା
ତା’ ସୁପ୍ତ ବାଲୁକା ବେଳାରେ
ମୁଁ ଦିନେ ଭେଟିଥିଲି ମୋ ପ୍ରେମକୁ
କେଉଁ ଏକ ଦୂର୍ବଳ ମୁହୂର୍ତ୍ତରେ
ତା’ ତନୁ ବୈଭବ ସୁଷମାରେ
ଝୁମିଝୁମି ମତୁଆଲା ହୋଇ
ହଜିଥିଲି ତା’ ପ୍ରେମରେ ….
ସତରେ !
ଏଇ ଅଳସୀ ଅଳକା
ଆଜି ବି ଦେଖୁଛି
କେତେ ଆଶା ଆଉ ହତାଶା ସହିତ
ସ୍ୱପ୍ନସବୁ ଧୂଳିସାତ୍ ହେବାର କ୍ଷଣକୁ
ଅନେକ ଅଭୁଲା ସ୍ମୃତିର ଗନ୍ତାଘର ସାଜି
ସାଇତି ରଖିଛି କେତେ ପ୍ରେମୀଙ୍କର
ହୃଦୟର କମ୍ପନକୁ ତା’ ନିଜ ଛାତିରେ …….
