ବଡ଼ ହୋଇ ବାପ ନାଆଁ ରଖିବା
ଚାକିରି ବଣିଜରୁ ଘର ପୋଷିବା
ହାରିବାକୁ ନାହିଁ ଆମ୍ଭେ ଅନୁମତି
ପୁଅ ଜନ୍ମ ଆମ୍ଭେ ଦେଇଛି ନିୟତି ।
ଦୁନିଆ ଦସ୍ତୁର ସଦା ପ୍ରଚଳିତ
ଅନୁକମ୍ପା ନାହିଁ ଆମରି ସହିତ
ସନ୍ଦେହ ଚକ୍ଷୁରେ ପରମାଦ ଗଣି
ପରତେ ନଯିବେ ଆମ କଥା ଶୁଣି ।
ପୁଲିସିର ଠେଙ୍ଗା ଆଇନିର ଫନ୍ଦା
ଆମ ଲାଗି ସିନା ତତ୍ପର ସଦା
ପ୍ରଥମେ ପାହାର ତାପରେ ପଚାର
କିସ ନାଆଁ ତୋର କେଉଁଠାରେ ଘର ?
ସରକାର କଲେ ସାବତ ପୁଅ
ଦରଖାସ୍ତ ଦେଲେ କହନ୍ତି ରହ
ଟିକସ ହେଉ ଅବା ରେଳଭଡ଼ା
ରିହାତି ମିଳିବ ହୋଇଲେ ବୁଢ଼ା ।
ଫୁଲର ଜୁଲମ କଣ୍ଟାର କ୍ଷତ
ପ୍ରତିପକ୍ଷ ସାଧେ ଅନବରତ
ଆଖିରେ ପଟି ଆଉ ମୁହଁରେ ତୁଣ୍ଡି
ନଦେଲେ ଢୁକିବ ପୁଲିସି ଫାଣ୍ଡି ।
ଗାଧୋଇ ଗଲାଣି ଗେରସ୍ତଗିରି
ଡାକିଲେଣି ଏବେ ନାଆଁକୁ ଧରି
କଚେରୀ ଦୁଆରେ ଆମେ ଭିକାରୀ
କଥା କଥାକରେ ଯାଏ ଚାକିରି ।
ବାହାସ୍ପୋଟ ମାରେ କିଆଁ ପୁରୁଷ
ନାକ ନିଶ ହେଲା ବେକର ଫାଶ
କର୍କଶ ମୂର୍ଚ୍ଛନା କାହିଁ ରଚିଲୁ
ପ୍ରଭୁ! ମରଦକୁ ସିନା ବଳଦ କଲୁ !
