ଆମ ଗାଁ ପାଖ ନଦୀରେ କୋଉଠୁ ଏତେ ପାଣି ଆସିଲା କେଜାଣି ? ଦେଖୁ ଦେଖୁ ଚାରି ଆଡେ ଖାଲି ହାହାକାର ଶୁଣିବାକୁ ମିଳିଲା । ଆଗରୁ କେବେ ଏତେ ପାଣି ଆମ ଗାଁ ପାଖ ନଦୀରେ ଆସି ନଥିଲା ହେଲେ ହଠାତ୍ ଏମିତି ନଦୀଟା ଭୟଙ୍କର ହେଇଗଲା ଯେ ଦେଖୁ ଦେଖୁ ପଚିଶି ଜଣକୁ ଭସେଇ ନେଇଗଲା । ସେ ଭିତରେ ଥିଲେ ମୋ ଜେଜେ ବାପା କେତେ ଖୋଜା ଖୋଜି କରିବି ମୋ ଜେଜେ ବାପାଙ୍କର ଶବ ମିଳିଲାନି । ରାକ୍ଷୀ ପୂନେଇଁ ଦିନଟାରେ ମୋ ଜେଜେମାଁ କେତେ ସରାଗରେ ପିଠା ପଣା ତିଆରି କରି ରଖିଥିଲା ଆମ ମାନଙ୍କ ପାଇଁ । ହେଲେ ଆଜିର ଦିନଟାରେ ଏମିତି ଗୋଟେ ଅଘଟଣ ଘଟିଗଲା , ୟା ପରଠୁ ଆମ ଘରେ ଆଉ ପୂଜା ପରବରେ ପିଠା ପଣା ହୁଏନି ।
ସାହି ପଡିଶା ବୁଝଉଥିଲେ ମୋ ଜେଜେ ମାଁକୁ ଆଉ କୁଆଡେ ମୋ ଜେଜେ ବାପା ଫେରିବେନି । ହେଲେ ମୋ ଜେଜେ ମାଁ କିନ୍ତୁ କାହା କଥା ଶୁଣେନି ବିଧବା ଭଳିଆ ଧଳା ଲୁଗା ପିନ୍ଧିବା ତ ଦୂରର କଥା ମଥାର ସିନ୍ଦୁର ବି ପୋଛିନି ଏ ଯାଏଁ । ମୋ ଜେଜେ ମାଁର ଏକା ଯିଦ୍ ଜେଜେ ବାପାଙ୍କ ଶବକୁ ଆଖିରେ ନଦେଖିବା ଯାଏଁ ସେ ମାନିବନି ଏ ସମାଜର ରିତିନୀତିକୁ । ହେଲେ ଛୋଟ ପିଲାଟେ ହୋଇଥିବାରୁ ମୁଁ ଏସବୁ କିଛି ବୁଝି ପାରେନି, ଖାଲି ଯାହା ବନ୍ୟା ନାଁଟା ଶୁଣିଲା ବେଳକୁ ମୋ ମନ ଭିତରେ ଗୋଟେ ଛନକା ପଶିଲା ଭଳିଆ ଲାଗେ ।
ଜେଜେ ବାପା ଚାଲିଯିବା ଦିନଠୁ ମୋ ବାପା ଖାଲି ଗୁମ୍ ମାରି ବସୁଥିଲେ । ଜେଜେ ବାପା ଥିଲା ବେଳେ ଘରର ସବୁ ଯାବତିୟ କାମ ସାଙ୍ଗକୁ ବିଲବାଡି କଥା ବୁଝୁଥିଲେ । ଆଜି ଯେତେ ବେଳେ ଆମ ଗାଁ ପାଖ ନଦୀର ବନ୍ୟା ସବୁକିଛି ଓଲଟପାଲଟ କରି ଦେଇଛି ଆମ ଘରର ସବୁ ବୋଝ ମୋ ବାପାଙ୍କ ଉପରେ । ଆମର ସେମିତି ଥିଲା ବାଲା ଘର ନାହିଁ ତଥାପି ବାପା ମୋତେ ଖୋଇ ପେଇ ଦି ଅକ୍ଷର ପାଠ ପଢେଇବାରେ କୌଣସି ବାଧା ଉପୁଯେଇ ନାହାନ୍ତି । ଧିରେ ଧିରେ ମୁଁ ବଡ ହୋଇଗଲି ଆଉ ମୋ ବାପା ଘରର ଆର୍ଥିକ ବୋଝ ମୁଣ୍ଡଉ ମୁଣ୍ଡଉ କରଜରେ ଡୁବି ଯାଇଥିଲେ । ଆଗରୁ ମୋ ବାପାଙ୍କୁ କେବେ ମଦ ପିଇବାର ଦେଖି ନଥିଲି ହେଲେ ଆମ ଘରର ପରିସ୍ଥିତି ବିଗିଡିବା ଆରମ୍ଭ ହଉହଉ ବାପା ମଦ ପିଇବା ଆରମ୍ଭ କରି ଦେଇଥିଲେ ।
ମଦରେ କଣ ଅଛି କେଜାଣି, ମୋ ବାପାଙ୍କୁ ଲାଗୁଥିଲା ସତେ ଯେମିତି ମଦ ସାହାରାରେ ସବୁକିଛି ସମାଧାନ ହେଇଯିବ । ବାପା ମଦ ପିଇ ରାତିରେ ଘରକୁ ଫେରନ୍ତି ଆଉ ଦୁନିଆ ଜାକର ଦାଉ ସାଧନ୍ତି ମୋ ବୋଉ ଉପରେ । ମୋ ବାପା ମଦପିଇ ଘରକୁ ଫେରିଲେ କେବେ କେମିତି ବୋଉ କଳି କଜିଆ ଲାଗେ ଆଉ କେବେ କେବେ ଭାଗ୍ୟକୁ ଆଦରି ଚୁପ୍ ଚାପ୍ ବାପାଙ୍କ ଜୁଲମ ସହିଯାଏ । ଏ ସବୁ ଦେଖି ମୋତେ କିଛି ଭଲ ଲାଗେନି ହେଲେ ବାପାଙ୍କୁ କିନ୍ତୁ କେବେ ସାହାସ କରି କିଛି କହି ପାରେନି ।
ଏ ଭିତରେ ହାତ ପାହାନ୍ତାରେ ଦେଖୁ ଦେଖୁ ହାଜର ହୋଇଗଲା ସରପଞ୍ଚ ଇଲେକ୍ସନ । ଆମ ଗାଁର ସାହୁକାର ନିଜେ ଲଢୁଛନ୍ତି ସରପଞ୍ଚ ପଦବି ପାଇଁ । ସେଇଥି ପାଇଁ ଆମ ଗାଁ ସାହୁକାର କିଛି ପାଖ ଲୋକଙ୍କ ହାତରେ ଡକେଇ ଥିଲେ ମୋ ବାପାଙ୍କୁ ତାଙ୍କରି ପାଖକୁ ଆସିବା ପାଇଁ । ମୋ ବାପା ମଦ ପିଇଲେ କଣ ହେଲା ଯିଏ କେହିବି ସାହାଯ୍ୟ ପାଇଁ ହାତ ପସାରୁ ପଛେ ମୋ ବାପା ବେଠି ଖଟିବା ପାଇଁ ସାଙ୍ଗେ ସାଙ୍ଗେ ହାଜର ହୋଇଯିବେ ତାରି ପାଖରେ । ପୁଣି ଖୋଦ୍ ଆମ ଗାଁ ସାହୁକାର ଯେତେ ବେଳେ ଲୋକ ପଠେଇଛନ୍ତି ମୋ ବାପାଙ୍କ ପାଖକୁ, ମୋ ବାପାଙ୍କ ପାଖରେ ନ ଯିବାର କିଛି କାରଣ ନଥିଲା ।
ମୋ ବାପାଙ୍କୁ ସେ ଦିନ ସାହୁକାରଙ୍କ କିଛି ପାଖ ଲୋକ ବୁଝଉଥିଲେ ଆଉ ମାତ୍ର କୋଡିଏ ଦିନ ରହିଲା ସରପଞ୍ଚ ଇଲେକ୍ସନ । ଏଣିକି ଆମ ଗାଁକୁ ରାଜନେତାମାନଙ୍କର ଭିଡ ଲାଗିରହିବ, ସେମାନଙ୍କ ଭଲମନ୍ଦ ସବୁ ବୁଝିବା ଦାୟୀତ୍ୱ କୁଆଡେ ମୋ ବାପାଙ୍କର । ମୋ ବାପା ବି ସେଥିରେ ହଁ ମାରିଥିଲେ ହଁ ମାରିବେନି କେମିତି ଯେ ଗାଁଟା ଯାକର ବେଠି ଖଟନ୍ତି ମୋ ବାପା ପୁଣି ଆଗରୁ ଅସମୟରେ ଗାଁ ସାହୁକାର ଆମ ଜମିବାଡି ବନ୍ଧକ ରଖି କରଜ ଦେଇଛନ୍ତି ।
ରାତି ପାହି ସକାଳ ହଉହଉ ମୋ ବାପା ହାଜର ହୋଇଗଲେ ଗାଁ ସାହୁକାରଙ୍କ ଘରେ । ମୋ ବାପାଙ୍କୁ ପାଖରେ ଦେଖି ଗାଁ ସାହୁକାର ଜୋର୍ ଜୋରରେ ପାଟିକରି କହୁଥିଲେ ଆରେ ଏତେ ଡେରି କଣ କରୁଛୁ ସେପଟେ ତେଣେ ବହୁତ କାମ ଅଛି । ଏତିକି କହି ଗାଁ ସାହୁକାର ବୁଝଉଥିଲେ କୋଉଠି ଟେଣ୍ଟ ବନ୍ଧା ହବ କୋଉଠି ରୋଷେଇ ବାଷ ହବ ଏମିତି କେତେ କଣ ଏତିକି କହୁକହୁ ଗାଁ ସାହୁକାର ବୁଝଉଥିଲେ ମୋ ବାପାଙ୍କୁ ଏ କୋଡିଏ ଦିନ ଭିତରେ ଖାଇବା ପିଇବାରେ ମୋ ବାପାଙ୍କର କୁଆଡେ କିଛି ଅସୁବିଧା ହବନି ତାରି ସାଙ୍ଗକୁ ସାହୁକାର ପ୍ରତିଶୃତି ଦେଇଥିଲେ ମୋ ବାପାଙ୍କୁ ଏ ଥର ସରପଞ୍ଚ ପ୍ରାର୍ଥୀରେ ଜିତିଲେ ଖୁସିରେ ମୋ ବାପାଙ୍କର ସବୁ କରଜ କ୍ଷମା କରି ଦେବେ ।
ଗାଁ ସାହୁକାରଙ୍କ ମୁଁହରୁ ଏମିତି ପ୍ରତିଶୃତି ଶୁଣି ମୋ ବାପା ମନେମନେ ଭଗବାନଙ୍କ ପାଖରେ ମିନତି କରୁଥିଲେ ଆମ ଗାଁ ସାହୁକାରଙ୍କୁ ସରପଞ୍ଚ ପ୍ରାର୍ଥୀରେ ଜିତେଇବା ପାଇଁ । ଏ କୋଡିଏ ଦିନ ଭିତରେ ବାପା ଘରକୁ ଫେରିବା ବେଳକୁ ପାଖାପାଖି ରାତି ବାରଟା ବାଜି ଯାଉଥାଏ । ମୋ ବୋଉ ସେମିତି ଅପେକ୍ଷାରେ ଥାଏ ମୋ ବାପାଙ୍କର , ମୋ ବାପା କିନ୍ତୁ ମଦ ନିଶାରେ ମାତାଲ୍ ହୋଇ ଫେରିଥାନ୍ତି ଘରକୁ । ମୋ ବାପାଙ୍କୁ ଏମିତି ପରିସ୍ଥିତିରେ ଦେଖି ମୋ ବୋଉ ଖାଲି ଗୁମ୍ ମାରି ବସେ । ଏମିତି ଦେଖୁଦେଖୁ କୋଡିଏ ଦିନ ବିତି ଯାଇଥିଲା । ଦେଖୁଦେଖୁ ଆମ ଗାଁ ସାହୁକାର ସରପଞ୍ଚ ପ୍ରାର୍ଥୀ ଭାବରେ ବିପୁଳ ଭୋଟରେ ବିଜୟୀ ହୋଇ ଯାଇଥିଲେ । ମୋ ବାପାଙ୍କ ଖୁସି କହିଲେ ନ ସରେ, ଖୁସି ଖବରଟା ଶୁଣୁଶୁଣୁ ବାପା ଜଲଦି ଜଲଦି ଘରକୁ ଆସି ମୋ ବୋଉକୁ ବୁଝଉଥିଲେ ଆମର ସବୁ କରଜ ଖୁସିରେ ଗାଁ ସାହୁକାର ଛାଡ କରିଦେବେ । ମୋ ବାପାଙ୍କ ମୁଁହରୁ ଖୁସି ଖବରଟା ଶୁଣି ମୁଁ ଆଉ ମୋ ବୋଉ ଭାବୁଥିଲୁ ବାପା ଆଉ ମଦ ପିଇବେନି, କରଜ ଭାରଟା ମୁଣ୍ଡ ଉପରେ ଆଉ ନାହିଁ ଯେତେ ବେଳେ ବାପାଙ୍କର ମଦ ପିଇବା ଅଭ୍ୟାସଟା ବଳେବଳେ ଛାଡିଯିବ ।
ଖୁସି ଖବରଟା ଘରେ ଜଣଉ ଜଣଉ ତରବରିଆ ଭାବରେ ବାପା ଫେରିଯାଇଥିଲେ ଗାଁ ସାହୁକାରଙ୍କ ଘରଆଡେ , ଆଉ ଯାଉ ଯାଉ ବୋଉକୁ କଥା ଦେଇଥିଲେ ଜଲଦି ଘରକୁ ଫେରିବା ପାଇଁ । ଏତେ ବଡ ଖୁସି ଦିନରେ ଗାଁ ସାହୁକାର ଆୟୋଜନ କରିଥିଲେ ବିରାଟ ବଡ ଭୋଜି , ସେହି ଭୋଜିକୁ ଆମନ୍ତ୍ରିତ ହୋଇ ଆସିଥିଲେ ପାଖ ସହରର ବଡ ବଡ ନେତା । ଆୟୋଜିତ ଭୋଜିରେ ଖାଇବା ସାଙ୍ଗକୁ ଦେଶି ଆଉ ବିଦେଶି ମଦର ବନ୍ଦୋବସ୍ତ ହୋଇଥିଲା ଆଉ ଲାଗୁଥିଲା ସତେ ଯେମିତି ଆଜିର ଦିନରେ ଆମ ଗାଁରେ ମଦର ବନ୍ୟା ହୋଇଯାଇଛି । ଗାଁଟା ଯାକର ମଦ୍ୟପ ଦେଶି ମଦ ପିଇ ମତୁଆଲା ହୋଇଯାଇଥିଲେ ସେ ଭିତରୁ ମୋ ବାପା କେମିତି ବାଦ୍ ପଡିଥାନ୍ତେ ।
ଏତେ ବଡ ଖୁସିର ଦିନରେ କିନ୍ତୁ ସବୁ କିଛି ଓଲଟ ପାଲଟ ହୋଇଗଲା । ଦେଖୁ ଦେଖୁ ଦେଶି ମଦର ପ୍ରଭାବଟା ଏତେ ଖରାପ ହୋଇଗଲା ଯେ ପାଖାପାଖି ଷାଠିଏରୁ ସତୁରି ନିରିହ ଜୀବନ ବେକାର ହୋଇଗଲା କିଛି ସମୟ ଭିତରେ । କିଛି ଲୋକ ଅନ୍ଧ ହୋଇଯାଇଥିଲେ ଆଉ କିଛି ଲୋକ ମୃତ୍ୟୁ ମୁଖରେ ପଡି ଛଟ ପଟ ହେଉଥିଲେ । ଦେଶି ମଦଟା କେମିତି ବିଶାକ୍ତ ହେଇଗଲା କେଜାଣି ସେ ଦେଶି ମଦର କୁପ୍ରଭାବରୁ ମୋ ବାପା ବି ବର୍ତ୍ତି ପାରିନଥିଲେ ।
ମୋ ପିଲା ଦିନେ ଆମ ଗାଁରେ ଭୟଙ୍କର ବନ୍ୟା ଆସିଥିଲା ହେଲେ ମୋ ଜେଜେ ବାପାଙ୍କୁ ମିସେଇ ମାତ୍ର ପଚିଶି ଜଣ ପ୍ରାଣ ହରେଇଥିଲେ । ଆଜିର ଏ ମଦର ବନ୍ୟାରେ କିନ୍ତୁ ମୋ ବାପାଙ୍କୁ ମିସେଇ ପାଖାପାଖି ଷାଠିଏ ଜଣଙ୍କ ଜୀବନ ଦୀପ ଲିଭି ଯାଇଥିଲା । ମୋ ବୋଉ ସେମିତି ଅପେକ୍ଷା କରି ରହିଥିଲା ମୋ ବାପାଙ୍କ ଆସିବା ବାଟକୁ ଯେମିତି ଆଗରୁ ଚାହିଁ ରହୁଥିଲା ସବୁରାତି । ଦେଖୁ ଦେଖୁ ଖବରଟା ଗାଁ ସାରା ପ୍ରଚାର ହୋଇଗଲା କିଛି ସମୟ ଭିତରେ । ମୋ ବୋଉ ଆଉ ମୁଁ ଖବର ପାଉ ପାଉ ସିଧା ଦୌଡିଲୁ ସରପଞ୍ଚ ବାବୁଙ୍କ ଭୋଜି ଆୟୋଜିତ ହୋଇଥିବା ଯାଗାକୁ ଯେଉଁଠି ମୋ ବାପା ଚିରଦିନ ପାଇଁ ଆଖି ବୁଜି ଦେଇଥିଲେ ବିଷାକ୍ତ ଦେଶି ମଦର ପ୍ରଭାବରେ । ମୋ ବୋଉ ମନ କିନ୍ତୁ ଜମାରୁ ବୁଝୁ ନଥିଲା ମନକୁ ମନ ଗୁଣୁଗୁଣୁ ହଉଥିଲା ମୋ ବାପା କୁଆଡେ ବଞ୍ଚିଛନ୍ତି ବୋଲି । ମୁଁ ଭଲ ଭାବେ ଜାଣି ସାରିଥିଲି ମୋ ବାପା ଆଉ ଏ ଦୁନିଆଁରେ ନାହାନ୍ତି ତଥାପି ମୋ ବୋଉର ମନ ବୁଝେଇବା ପାଇଁ ବାପାଙ୍କ ଶବକୁ କାନ୍ଧରେ ଧରି ଦୌଡିଲି ପାଖରେ ଥିବା ଡାକ୍ତରଖାନା ଉଦ୍ଦ୍ୱେଶ୍ୟରେ । ମୋ ପଛେ ପଛେ ମୋ ବୋଉ ଧାଉଁ ଥିଲା ପାଗଳି ଭଳିଆ । ଡାକ୍ତରଖାନାରେ ପହଞ୍ଚୁ ପହଞ୍ଚୁ ବାପାଙ୍କୁ ଦେଖି ଡାକ୍ତରବାବୁ ଘୋଷଣା କରିଦେଇଥିଲେ ମୋ ବାପାଙ୍କ ମରିବା ଖବର । ମୋ ବାପାଙ୍କ ମରିଯାଇଥିବା ଖବରଟା ଶୁଣି ମୋ ବୋଉ ମାନସିକ ଭାରସାମ୍ୟ ହରେଇ ଦେଇଥିଲା, ଆଉ ଡାକ୍ତରଖାନାର ଗୋଟେ କାନ୍ଥକୁ ଆଉଜି ଠିଆ ହୋଇଥିଲା । ମୋ ବୋଉର ଏମିତି ପରିସ୍ଥିତି ଦେଖି ମୋ ବୋଉ ପାଖକୁ ଯାଇ କୁଣ୍ଡଇ ଧରି ପକେଇଲି ,ଆଉ ଗୋଟେ ଛୋଟ ପିଲାଟେ ଭଳିଆ କଇଁକଇଁ ହୋଇ କାନ୍ଦିବାକୁ ଲାଗିଲି । ଆଖିରୁ ମୋର ଲୁହ ଧାର ଧାର ହୋଇ ଅନବରତ ଭାବେ ବୋହି ଚାଲିଥିଲା, ଲାଗୁଥିଲା ମୋ ଆଖିରେ ଲୁହର ବନ୍ୟା ଆସି ଯାଇଛି । ଆଉ ମୋତେ ଲାଗୁଥିଲା ସତେ ଯେମିତି ମୋ ଆଖିର ଲୁହର ବନ୍ୟାରେ ଏଇ ସଙ୍ଗେ ସଙ୍ଗେ ମୋ ବୋଉର ମଥାର ସିନ୍ଦୁର ଧୋଇ ହୋଇ ଯାଇଛି ………… ।
