ମା’ ହାତ ପାତିଲେ ସରଗକୁ
ଅଜାଡ଼ିଦିଏ କଅଁଳ କିରଣ
ଶୀତଳ ସରସତା
ଓଦା ହେଇଯାଏ ନଡ଼ିଆ ପତ୍ର
ତିନ୍ତିଯାଏ ଘାସ ଘର
ଜହ୍ନ ଆଲୁଅରେ ।
ଏବେ ଜହ୍ନର ଜମିରେ
ଜମି ଯାଇଚି ଜଳ
ପଥର ଖୋଲରେ ବର୍ଷାପାଣି ପରି
ଓସେନ୍ ସାଟେଲାଇଟ୍ ଆଖିରେ
ଝୁଲିଗଲା ବିନ୍ଦୁଏ ଭରସା
ଠୋପାଏ ଆଭାସ
ଆକସ୍ମିକ ଅଶେଷ ଆହ୍ଲାଦ
ଆଶ୍ୱାସନା ଆସନ୍ତାକାଲିର ।
ଝୁଣ୍ଟି ପଡ଼ିଲା ଗର୍ଭିଣୀ ତିରିଲା
ପାହାଡ଼ର ପେଟ
ଝୁଙ୍କିଗଲା ତା’, ବିଶ୍ୱାସ
ଠଣ୍ଠାଣ୍ ତା’ ହାତର କାଚ ।
ସୋର୍ଶିଂ ସାଟେଲାଇଟ୍
ଲୁନାରକ୍ରେଟର ଦୁହେଁ ମିଶି
ନିଗାଡ଼ି ଦେଲେ ରକ୍ତ
ଜହ୍ନଯୋନିରୁ
ଟପ୍ ଟପ୍ ଗଳିଲେ ବିନ୍ଦୁ ବିନ୍ଦୁ
ନିଆଁହୁଳା, ଧୂଳିଝଡ଼
ନାସାର କମ୍ପ୍ୟୁଟରରେ ।
ଅହଙ୍କାରୀ ଅପେକ୍ଷା କରିଚି ସମୟ
ଅପେକ୍ଷା କରିଛନ୍ତି ଫୁଲତୋଡ଼ାରେ
ସଦ୍ଦାମ, ହିଟଲର
ଲାଡ଼େନ୍ର ଫେରନ୍ତା ବାଟକୁ
ଆକାଶ ମଥାନରେ ।
ଜହ୍ନକୁ ନେଇ ଯୋଡ଼ ନାହିଁ
ଜାରଜ ସମ୍ପର୍କ ନଗ୍ରଜନେ
ଜହ୍ନଜମି ମାଙ୍କଡ଼ା ହେଉ କି ମାଙ୍କଡ଼
ଶଶା ହେଉ କି ଶାଶ୍ୱତ
ଆସ ଭଣଜା ଭାଣିଜିମାନେ
ଜହ୍ନ ସହ ଯୋଡ଼ିବା
ମା’ ମମତାରୁ ମାମୁଁର ସମ୍ପର୍କ !
