କହ ତୁମେ ଜଗନ୍ନାଥ କି ଅବତାର ନେଲ
ପିତାମାତା ଅଗୋଚର କି କୁଳେ ଜନ୍ମିଲ
ନାହିଁ ରାମ ଯଶ ଗାଥା ଗାନ କରିବାକୁ
ନାହିଁ କୃଷ୍ଣ ରାସ ଲୀଳା ଶୁଣି ତରିବାକୁ
ହେଲେ, ଏମିତି ଦେବତା କେଉଁଠି ମିଳନ୍ତା, ଭକ୍ତି କରିବାକୁ ।
କହ ତୁମେ ଜଗନ୍ନାଥ ନାହିଁ ହସ୍ତ ପଦ
ଭକତ ରକ୍ଷା ହେତୁ କେମନ୍ତେ ସମର୍ଥ
ଜନ୍ମରୁ କାଲ ବୋଲି ହୋଇଲ ନିର୍ବାକ
ସ୍ତବ୍ଧ ଚକିତ ତୁମ ନୟନ ଅପଲକ
ହେଲେ, ଏମିତି ଦେବତା କେଉଁଠି ମିଳନ୍ତା, ଦେଖି ଝୁରିବାକୁ ।
କହ ତୁମେ ଜଗନ୍ନାଥ ବିଳାସେ ମଗନ
ଭୁଞ୍ଜିବାର ଲାଗି ଖଞ୍ଜା ଭୋଗ ଛପନ
ଶୟନ ନିମନ୍ତେ ସଜା ବଡ଼ ଦେଉଳ
ଦାନ ମିଳେ ତୁମ୍ଭେ ସିନା ନଭରେ ଭିକ୍ଷା ଥାଳ
ହେଲେ, ଏମିତି ଦେବତା କେଉଁଠି ମିଳନ୍ତା, ଦୁଃଖ ଶୁଣିବାକୁ ।
କହ ତୁମେ ଜଗନ୍ନାଥ କି ପାପି ଦଣ୍ଡିଲ
ଧରା ଉଦ୍ଧାର ହେତୁ କି ଦୈତ୍ୟ ଖଣ୍ଡିଲ
ରଥାରୂଢ଼ ହୋଇ ଯୁଦ୍ଧେ ସ୍ଥାପିଲ କି ଧର୍ମ
ରଥେ ବସି ଯାତ୍ରା କର ନଥାଇ ସରମ
ହେଲେ, ଏମିତି ଦେବତା କେଉଁଠି ମିଳନ୍ତା, ମୁକତି ଦେବାକୁ ।
