ଆପଣଙ୍କ ବ୍ରାଉଜରରେ ଏହି ସୁବିଧା ଉପଲବ୍ଧ ନାହିଁ।
ଅଜସ୍ର ଭଲ ପାଇବାର
ଭାଷା ସବୁ
ଏକାଠି ସଜାଡ଼ି ଦେଲି
ଶବ୍ଦରେ ଶବ୍ଦକୁ ଗୁନ୍ଥି
ମାଳାଟିଏ କଲି
ଚୁପ୍ଚାପ୍
ଏକଲା ବେଳରେ
ସଜାଇଲି
ତମ ପାଇଁ
ପ୍ରୀତିର ପାର୍ବଣ
ତମେ ଦେଖ ବା ନ ଦେଖ
ଛୁଅଁ ବା ନ ଛୁଅଁ
ବାରମ୍ୱାର ପାଇଛି ତୁମକୁ
ସ୍ୱପ୍ନର ପୃଥିବୀରେ
ଈଶ୍ୱରଟେ ପରି
ବର୍ଷା ଭିଜା ଅମାଅନ୍ଧକାରେ,
ଉଜ୍ଜ୍ୱଳ ନକ୍ଷତ୍ରଟେ ପରି
ଆଉ ମୋର କବିତାରେ
ଶବ୍ଦର ସମ୍ରାଟ ପରି ।
ତମେଇ ତ ଓଜଃସ୍ୱିନୀ
କରିଅଛ ମୋତେ
ଏ ଜନ୍ମରେ
ପୂଣ୍ୟ ଭରିଦେଇ
ପ୍ରୀତିପର୍ଣ୍ଣା
ସଜାଇଛ
ଫଗୁଣରେ ରଙ୍ଗ ମାଖି ଦେଇ ।
ତମେଇ ତ ଇପ୍ସିତ ମଣିଷ ମୋର
ହୃଦୟର
ଭଲ ପାଇବାର
କବିତାର
ଜୀବନର
ଆଉ ମୋର
ଅନ୍ତିମ ଦିନର ।
ସେ ପାଇଁ ତ
ତୁମକୁ ମୋ
କୋଟି ନମସ୍କାର ।
