ଅଣୁଗଳ୍ପ

ବିଚରା ବାଘମାମୁଁ

Shrimanta Kumar Panda's odia short story Bichara Baghamaamu

ବାଘକୁ ଶିକାରୀ ଓ ତାଙ୍କୁ ଜଗୁଥିବା କର୍ମଚାରୀ ମାନଙ୍କ ଠାରୁ କେହି ରକ୍ଷା କରି ପାରିବେ ନାହିଁ ।

ବିଚରା ବାଘମାମୁଁ

ଜୁଲାଇ ୨୯ ତାରିଖ ଦିନ ଆନ୍ତର୍ଜାତିକ ବାଘ ଦିବସ ପାଳନ ହେଲା । ସେଦିନ ବାଘ ବିଷୟରେ ନିଜ ପୁଅକୁ ଜ୍ଞାନ ଦେବାପାଇଁ ଜଣେ ବାପା ନିଜ ପୁଅକୁ ଗୋଟିଏ ବାଘ ଅଭୟା ଅରଣ୍ୟ ଦେଖାଇ ନେଲେ । ଅଭୟା-ଅରଣ୍ୟ ବାହାରେ କୋଡିଏ ଫୁଟ କାନ୍ଥ ଓ ତା ଉପରେ ଦଶ ଫୁଟ ତାରବାଡ ଦିଆ ଯାଇଥାଏ ।

ଛୋଟ ପୁଅଟି ବାପାକୁ ପଚାରିଲା:

–ବାପା, ଅଭୟା ଅରଣ୍ୟରେ ଏତେବଡ ପାଚେରୀ କାହିଁକି ଦିଆ ଯାଇଛି ?

— ଭିତରେ ଥିବା ବାଘ ଓ ଅନ୍ୟ ପଶୁମାନେ ବାହାରିକୁ ଆସି ପାରିବେ ନାହିଁ ।

— ବାଘ କେତେ ଉପରକୁ ଡ଼େଇଁପାରେ ?

— ଅଠର ଫୁଟ ।

— ତା ହେଲେ କୋଡିଏ ଫୁଟ ପାଚେରୀ ଉପରେ ପୁଣି ଦଶ ଫୁଟ ତାର ବାଡ଼ କାହିଁକି ଦିଆ ଯାଇଛି ?

— କୋଡିଏ ଫୁଟ କାନ୍ଥ ଏଇଥି ପାଇଁ ଦିଆ ଯାଇଛି ଯେ, ବାଘ ବାହାରକୁ ଆସି ମଣିଷକୁ ମାରି ପାରିବ ନାହିଁ । ଅଧିକ ଦଶ ଫୁଟ ତାରବାଡ ଏଇଥି ପାଇଁ ଦିଆ ଯାଇଛି ଯେ ମଣିଷ ତା ଭିତରକୁ ପଶି ବାଘକୁ ମାରି ପାରିବ ନାହିଁ । ତା ନ ହେଲେ ମଣିଷ ସବୁ ବାଘକୁ ସଫା କରିଦେବେ, ଯେମିତି ଓଡିଶାର ସବୁ ଜଙ୍ଗଲରୁ ବାଘକୁ ସଫା କରି ଶିକାରୀ ମାନେ ଚମଡା ବାହାରେ ଦେଶରେ ବିକ୍ରି କରି ଦେଉଛନ୍ତି ।

— ତା ହେଲେ କଣ ଏମିତି ଦିନ ଆସିବ ଦୁନିଆରୁ ବାଘ ଲୋପ ପାଇଯିବ ?

— ନା, ସେମିତି ହେବନି ।

— ତା ହେଲେ ବାଘକୁ ଶିକାରୀ ମାନଙ୍କ ଠାରୁ କିଏ ରକ୍ଷା କରିବ ?

— ବାଘକୁ ଶିକାରୀ ଓ ତାଙ୍କୁ ଜଗୁଥିବା କର୍ମଚାରୀ ମାନଙ୍କ ଠାରୁ କେହି ରକ୍ଷା କରି ପାରିବେ ନାହିଁ । ତେବେ ଯଦିଓ ବାଘ ରହିବ ନାହିଁ, ବାଘମାମୁଁ ସବୁଦିନ ରହିବ । ସେ ବହି, କେଲେଣ୍ଡର, ଫେସବୁକ ଓ WhatsApp ରେ ବଞ୍ଚି ରହିବ । ସେଥିପାଇଁ ମୁଁ ତତେ ବାଘ ଦେଖାଇବାକୁ ଆଣିଛି । ଆଗକୁ ସତ ବାଘ ଆଉ କେହି ଦେଖି ପାରିବେ ନାହିଁ ।

ପ୍ରକାଶିତ ହୋଇଥିବା ଲେଖିକା/ଲେଖକଙ୍କ ତାଲିକା

ଲୋକପ୍ରିୟ ଲେଖା

To Top