ସିଏ କହୁଥିଲେ ତାଙ୍କୁ କାଳେ ଲମ୍ବା ଘନ, ଆଉ ସୁନ୍ଦର ଛୁଟି ଭଲ ଲାଗେ । ମୁଁ ତାଙ୍କୁ କାଳେ ସେମିଟି ଦୁନିଆର ସବୁଠୁ ଅଧିକ ସୁନ୍ଦର ଦେଖାଯାଏ । ମୋତେ ସବୁବେଳେ କୁହନ୍ତି ତୁମେ ଚୁଟି ଖୋଲା ରଖ, ଆଉ ମୁଁ ତାଙ୍କ କଥା ମାନେ ବି । ତାଙ୍କର ପ୍ରତି କଥା ମାନିବାକୁ ମୋତେ ବି ଭଲ ଲାଗେ । କେବେ ବାଧ୍ୟ ବାଧକ ଅନୁଭବ ହେଇନି । ମୋ ପାଖରେ ଶୋଇଲା ବେଳେ ସେ ଚୁଟି ସହ ଖେଳେନ୍ତି ଆଉ ତାକୁ ଧରି କେତେ ତାର ପ୍ରଶଂସା ବି କରନ୍ତି । ମୋ ସୁଖ ଦୁଃଖ ସବୁ ସିଏ ବୋଲି ମୁଁ ଭାବି ନେଇଛି । ଶାଶୁ ଘରକୁ ଆସିବା ପାଇଁ ସିଏ ହିଁ ତ ଏକ ମାତ୍ର କାରଣ ଥିଲେ । ତାଙ୍କ ଭଲ ପାଇବା ସବୁବେଳେ ମୋ ପାଇଁ ଅବିରତ ଅଜାଡି ହୋଇ ରହିଥିଲା । କେବେ ତାଙ୍କୁ ଏତେ ରାଗ କି କ୍ରୋଧରେ ଦେଖିନି । କାହାକୁ ହୁଡ଼ିକି କହିବା, ଗାଳି ଗୁଲଜ କରିବା କେବେବି ଶୁଣିନି ।
ସେ ଦିନ କଣ ହେଲା କେ ଜାଣି ମୁଁ ଖାଇବା ବାଢି ଦେଇ ରୋଷେଇ ଘର ପଟେ ଥାଏ । ସେ ଖାଉଥିବା ଘରୁ ଜୋର୍ରେ ଗୋଟେ ଶବ୍ଦ ହେଲା । ମୁଁ ଦୌଡ଼ି ଯାଇ ଦେଖିଲି କି ସେ ନିଜେ ହିଁ ଖାଉଥିବ ବାସନାକୁ ଫିଙ୍ଗି ଘର ସାରା ଛିନ୍ଛତ୍ର କରିଛନ୍ତି । ତାଙ୍କ ମୁହଁ ରାଗରେ ଲାଲ ପଡି ଯାଇଛି, ଆଉ ମୁହଁରୁ ଖାଲି କୁଭାଷା ବର୍ଷଣ ହେଉଛି । ମୋତେ ସେଦିନ କେତେ କଥା କହିଗଲେ , ମୋ ମା’ ମୋତେ କିଛି ଶିଖେଇନି, ମୋ ସଂସ୍କାର ନାହିଁ, ମୁଁ ଗୋଟେ ପୋଚରୀ । କାହାକୁ କେମିତି ଶାନ୍ତିରେ ମୁଠେ ଖାଇବାକୁ ଦିଆଯାଏ ଜାଣିନି । ଏମିତି କେତେ କଣ… ଯାହା ପାଟିକୁ ଆସିଲା ବକି ଦେଇ ଗଲେ । ନା ସେଥିରେ ଥିଲା ଦୟା ନା କିଛି ବୁଝିବାର ଶକ୍ତି ଥିଲା ତାଙ୍କ ପାଖରେ । ପଚାରିବାରୁ ଜାଣିଲି ଯେ ମୁଁ କୁଆଡେ ସେଦିନ ବହୁତ ବଡ଼ ଭୁଲ କରି ଦେଇଛି । କାରଣ ସେ ଖାଉଥିବା ଖାଦ୍ୟରୁ ମୋ ଚୁଟି ଗୋଟେ ବାହାରିଛି ଆଉ ତାଙ୍କୁ ଖରାପ ଲାଗିଛି ସେଥିପାଇଁ ସେ ଏଭଳି ଏକ କାଣ୍ଡ ଘଟେଇଛନ୍ତି ।
ତାଙ୍କୁ ଖୁସି କରିବାକୁ ମୁଁ ସେଦିନ ମୁଣ୍ଡ ଛଡାଇ ଖୋଲା ରଖି ସୁଖାଉଥିଲି । କାଳେ ତାଙ୍କ ଖାଇବାରେ ଡେରି ହେଇଯିବ ଭାବି ରୋଷେଇ ବି କରିଦେଲି । ରୋଷେଇ କଲା ବେଳେ କେତେବେଳେ କଣ ପଡ଼ିଥିବ ମୁଁ କଣ ଜାଣିଥିଲି । ହେଲେ ସିଏ ବୁଝିଲେ ତ , ସେ ଦିନ ତାଙ୍କର ସେ ପ୍ରେମ, ପୁରୁଷ ପଣିଆ, ମଣିଷ ପଣିଆ ଆଉ ସ୍ତ୍ରୀ ର ସ୍ବାଧୀନତା ସମ୍ମାନ ସବୁ ପରସୀ ଦେଲେ ଏକାଥରେ । ମୋତେ ବୁଝିବାକୁ ବି ଥରେ ଚେଷ୍ଟା କଲେ ନାହିଁ । ନିଜ ମନକୁ ଯାହା ଆସୁଥିଲା କହୁଥିଲେ, ମୁଁ କବାଟ କଣରେ ମୁହଁ କୁ ଲୁଚେଇ ଖାଲି ଯାହା କାନ୍ଦୁଥିଲି ଆଉ ଭଗବାନଙ୍କୁ ପଚାରୁଥିଲି ।
ହେ ଭଗବାନ ଇଏ କଣ ତାଙ୍କ ଭଲ ପାଇବା ଥିଲା ମୋ ପାଇଁ, ସାମାନ୍ୟ କଥା ପାଇଁ ମୋତେ ଏତେ କଥା ଶୁଣିବାକୁ ପଡିଲା । ସେହିଦିନଠାରୁ ଜାଣିଲି ଯେ ପୁରୁଷ ମାନେ ନାରୀକୁ ଉପଭୋଗର ବସ୍ତୁ ବୋଲି ଭାବନ୍ତି, ତାଙ୍କ ହିସାବରେ ଚାଲିବ, ହସିବ, ସଜେଇହେବ ଯଦି ତୁମେ ଦୁନିଆର ସବୁଠୁ ଭଲ ସ୍ତ୍ରୀ ହେଇ ପାରିବ । କେବେ ତାଙ୍କର ସ୍ତ୍ରୀ ପ୍ରତି ଟିକେ ସହାନୁଭୂତି ନ ଥାଏ ସବୁବେଳେ ସେ ନିଜ କଥା ଚିନ୍ତା କରନ୍ତି । ମୁଁ ସେଦିନ ରାତି ସାରା ଭାବୁଥାଏ ମୋ ଚୁଟି ସତରେ ତାଙ୍କୁ ଭଲ ଲାଗେ ନା ଘୃଣା, ଯେଉଁଥିପାଇଁ ଏସବୁ କଲେ । ଧନ୍ୟ ତୁମ ଭଲ ପାଇବା ଧନ୍ୟ ତୁମ ପ୍ରେମ ।
