ମନେପଡ଼େ ମୋ ଗାଁ ନଈପଠା, ଆମ୍ୱତୋଟା
ଜେଜେମାଙ୍କର କେତେ ଢଗ
ଆଉ ମଜାଥଟ୍ଟା,
ଆଈ ହାତ ରନ୍ଧା ଚକୁଳି ଆରିଷା ପିଠା. . . (୧)
ସମୟ ସୁଅରେ ହଜିଯାଏ ପିଲାବେଳ
ବାଲିଘର ତୋଳା ପୁଣି ଲୁଚକାଳି ଖେଳ. . . (୨)
ଗାଁ ମେଳା ଦଶହରା ପୁଣି ଦୀପାବଳି
ଯାନିଯାତ୍ରା ମହୋତ୍ସବ ଆଉ ରଜଦୋଳି. . . (୩)
ସବୁଜିମା ହରା ଭରା ପାନ ଧାନ କ୍ଷେତ
ବୈଶାଖର ଝାଞ୍ଜି ଖରା ପାହାନ୍ତିଆ ଶୀତ. . . (୪)
ଭସା ବାଦଲରେ ସପନର ପରିଭାଷା
ଦୂର ତାଳବଣେ ବାଇଚଢେ଼ଇର ବସା. . . (୫)
ବାଲିଘର ତୋଳା ଆଉ ପୁଣି ଲୁଚକାଳି
ଗାଁ ବଧୂମାନଙ୍କର ଶଙ୍ଖ ହୁଳହୁଳି. . . (୬)
ଥୁଣ୍ଟା ବରଗଛ ଆଉ ଗାଁ ଠାକୁରାଣୀ
ଦାଦି ଆଈଙ୍କର କେତେ ଅଭୁଲା କାହାଣୀ… (୭)
ରନ୍ଧା ରାଇ ମଞ୍ଜା ପୁଣି କଦଳୀର ଭଜା
ଜନ୍ମଦିନ ବାହାଘର ପାର୍ବଣ ଓ ପୂଜା. . . (୮)
ସହରର ଚାକଚକ୍ୟ ଆଉ ଆଡ଼ମ୍ୱରେ
ଭୁଲିଯାଏ କାଳେ ଆମ ଗାଁକୁ ସତରେ. . . (୯)
ପାର୍କ କ୍ଲବ୍ ଅବା ସପିଂମଲ୍ରେ
ମନେପଡ଼ ଗାଁ ତୁମେ ଝାପ୍ସା ଅତୀତରେ. . . (୧୦)
