ପାଟଳବରଣା ଉଷା ଦିଗ୍‌ବଳୟ ଧାରେ
ଦେଖାଇଲାଣି ଲପନ ରାତ୍ରି ଅବସାନେ
ଉଠିଲେଣି ନିଦ୍ରା ତେଜି ଗ୍ରାମ ଜନପଦ
ହୋଇବେ କର୍ମ ଚଞ୍ଚଳ ଜନ, ପ୍ରାଣୀମାନେ ।

ବାୟସ ସକଳ କରି କା’ କା’ ରବ
ଉଡ଼ି ବୁଲି ଚତୁର୍ଦ୍ଦିଗେ କରନ୍ତି ପ୍ରଚାର
ଉଠ ଉଠି ସର୍ବେ ପରା ହେଲାଣି ସକାଳ
ହେଉ କର୍କଶ ଶବଦ କରେ ଉପକାର ।

କୁକ୍କଟ ସଦର୍ପେ ଗ୍ରୀବାଚୁଳ ଟେକି
କକର-କ’ ଶବ୍ଦେ ଅବା ଏହା କହୁଥାଇ
କାହିଁକି ରହିଛ ଶୋଇ ଆହେ ବିଶ୍ୱବାସୀ
ସମୟ ଯାଉଚି ଗଡ଼ି କିବା ଜଣାନାହିଁ ।

ଚାଷୀକୁଳ ଚାଷ କାର୍ଯ୍ୟେ ହେଲେଣି ବାହାର
ବିଦ୍ୟାଳୟେ ଯିବା ପାଇଁ ଛାତ୍ରଛାତ୍ରୀ ଗଣ
ମନ୍ଦିର ପୂଜକ ସାରି ସ୍ନାନ ସରୋବରେ
ଫେରୁଛନ୍ତି କରି କରି ମନ୍ତ୍ର ଉଚ୍ଚାରଣ ।