ଅଣୁଗଳ୍ପ

ଆଜି ବି ନାରୀ ଅବହେଳିତ

Mamata Basantia's odia short story Aaji Bi Nari Abahelita

ପରମୁହୂର୍ତ୍ତ ରେ ଯେତେବେଳେ ମଧୁର ସ୍ୱାମୀ, ମନୋଜ ଏକଥା ସବୁ ଜାଣିପାରିଲା, ସେ ରାଗି ଯାଇ ମଧୁମତିର ସମ୍ପୂର୍ଣ ଶରୀର ରେ ଏସିଡ ଢାଳି ଦେଲା ଯାହା ଫଳରେ ମଧୁରର ଶରୀର ଓ ଚେହେରା ବିକୃତ ହୋଇଗଲା ।

ଚନ୍ଦନପାଟଣା ଗ୍ରାମରେ ମଧୁମତି ଘର । ଝିଅଟି ଖୁବ ସରଳ ଓ ନୀରିହା । ଅବଶ୍ୟ ଅପୂର୍ବ ରୂପ ଲାବଣ୍ୟର ଅଧିକାରୀ ନହେଲେ ମଧ୍ୟ ତା’ର ସରଳ ନିଷ୍ପାପ ହୃଦୟଟି ଖୁବ ସୁନ୍ଦର । ପିଲାଟି ବେଳରୁ ମଧୁମତିର ତା’ ପରିବାର ପ୍ରତି ଖୁବ ସ୍ନେହ ଆଦର ଥିବା ସହ ଦୁର୍ବଳତା ମଧ୍ୟ ରହିଥିଲା । ତାକୁ ତା’ର ବାପା ମା ଓ ପରିବାରର ଅନ୍ୟମାନେ ଯାହା କହୁଥିଲେ, ସେ ବିନା ପ୍ରତିବାଦରେ ତାକୁ ଗ୍ରହଣ କରିନେଉଥିଲା । ମଧୁମତି ଏକ ଯୌଥ ପରିବାରରେ ରହୁଥିଲା । ଯେଉଁଥିରେ ତା’ ବାପା, ମା, ସାନ ଭାଇ , ଭଉଣୀ ସହ ତା’ର ବଡ଼ବାପା ଓ ବଡ଼ାମାଆ ମଧ୍ୟ ରହୁଥିଲେ । ମଧୁମତି ବାପାଙ୍କର କିଛି ରୋଜଗାର ନଥିଲା । କିନ୍ତୁ ତା’ର ବଡ଼ବାପା ଜଣେ ଶିକ୍ଷକ ଥିଲେ । ତେଣୁ ପରିବାରର ସମ୍ପୂର୍ଣ୍ଣ ଭରଣ ପୋଷଣର ଦାୟିତ୍ୱ ତା’ ବଡବାପାଙ୍କ ଉପରେ ନ୍ୟସ୍ତ ଥିଲା । ଯେହେତୁ ଘର ତା’ ବଡ଼ବାପା ଚଳାଉ ଥିଲେ, ତେଣୁ ଘରର ଛୋଟ ବଡ ନିଷ୍ପତି ତା’ର ବଡ଼ପାପ ନେଉଥିଲେ । ଧୀରେ ଧୀରେ ସମୟ ଅତିବାହିତ ହେବା ସହ ମଧୁମତିର ବିବାହ ବୟସ ଉପସ୍ଥିତ ହେଲା । ତା’ର ପରିବାର ଲୋକେ ତା’ ପାଇଁ ବିବାହ ପ୍ରସ୍ତାବ ଖୋଜିବା ଆରମ୍ଭ କରିଦେଲେ ।

ଏମିତି ଖୋଜୁ ଖୋଜୁ ଗୋଟିଏ ପୁଅ ସହ ତା’ର ବିବାହ ସ୍ଥିର ହୋଇଗଲା । ତା’ର ପରିବାର ଲୋକେ ଅତି ଆଡ଼ମ୍ବର ସହକାରେ ତା’ର ବିବାହ ପାଇଁ ପ୍ରସ୍ତୁତି ଆରମ୍ଭ କରୁଥିବା ବେଳେ ଅନ୍ୟପଟେ ପରିବାରକୁ ଛାଡି ଯିବାର ହୃଦୟ ବିଦାରକ ଦୁଃଖ ଆଉ ଲୁହ କାହାକୁ ଦୃଷ୍ଟିଗୋଚର ହେଉନଥାଏ । ଧୀରେ ଧୀରେ ବିବାହର ସମସ୍ତ କାର୍ଯ୍ୟ ସୁଚାରୁ ରୂପେ ସମ୍ପାଦିତ ହେଲା । ମଧୁମତିର ବିବାହରେ ତା’ର ବଡ଼ବାପା ତାକୁ ଢେର ସୁନାଗହଣା ଦେଇଥିଲେ । ଯେଉଁ ସୁନାଗହଣା ପ୍ରତି ମଧୁମତି ର ସ୍ୱାମୀ ମନୋଜର ଲୋଭ ଥିଲା । ଧୀରେ ଧୀରେ ସମୟ ଅତିବାହିତ ହେବା ସହ ମଧୁ ଅନ୍ତଃସତ୍ଵା ହେଲା ଓ ଗୋଟିଏ ପୁତ୍ର ସନ୍ତାନ କୁ ଜନ୍ମ ଦେଲା ଓ ତା’ର ସଂସାର ସୁଖରେ ଚାଲିଥିଲା ।

ଏହିସବୁ ଭିତରେ ମଧୁମତି ଭାଇର କିଛି ଟଙ୍କା ଆବଶ୍ୟକ ହୋଇଛି । ସେ ଘରେ କାହାକୁ କିଛି ନଜଣେଇ ମଧୁମତିକୁ ସାହାଯ୍ୟ ମାଗିଲା । ମଧୁମତି ମଧ୍ୟ ମନା କରିପାରିଲା ନାହିଁ । ମଧୁମତି ମଧ୍ୟ ତା’ର ସ୍ୱାମୀ ମନୋଜଙ୍କୁ କିଛି ନ ଜଣେଇ ତା’ର ସମସ୍ତ ସୁନା ଗହଣା ତା’ ଭାଇକୁ ଦେଇଦେଲା । ମଧୁମତିର ଭାଇ ସେ ସୁନା ଗହଣା ସବୁକୁ ନେଇ ବିକ୍ରି କରି ତା’ ଆବଶ୍ୟକତା କୁ ପୁରାଣ କଲା । ପରମୁହୂର୍ତ୍ତ ରେ ଯେତେବେଳେ ମଧୁର ସ୍ୱାମୀ, ମନୋଜ ଏକଥା ସବୁ ଜାଣିପାରିଲା, ସେ ରାଗି ଯାଇ ମଧୁମତିର ସମ୍ପୂର୍ଣ ଶରୀର ରେ ଏସିଡ ଢାଳି ଦେଲା ଯାହା ଫଳରେ ମଧୁରର ଶରୀର ଓ ଚେହେରା ବିକୃତ ହୋଇଗଲା । ଏସବୁ ବିଷୟ ରେ ମଧୁମତି ର ବଡବାପା ଜାଣିପାରି ତା’ କୁ ତା ଶାଶୁ ଘରୁ ନେଇ ଆସିଲେ ଓ ଗୋଟିଏ ଭଲ ଡାକ୍ତର ଖାନାରେ ଚିକିତ୍ସିତ କରାଇଲେ । ମଧୁ ର ସ୍ୱାସ୍ଥ୍ୟାବସ୍ଥାରେ ଟିକିଏ ସୁଧାର ଆସିବା ପରେ ତା’ର ବଡ଼ବାପା , ମଧୁକୁ ନ୍ୟାୟ ଦେବା ପାଇଁ ଆଇନ୍ ର ଆଶ୍ରୟ ନେଲେ ହେଲେ ମଧୁ ତା’ର ସ୍ୱାମୀକୁ ବଞ୍ଚାଇ ବାକୁ ଯାଇ କୋର୍ଟ କାଠଗଡ଼ାରେ ମିଛ ସାକ୍ଷୀ ଦେଲା କି ଏସବୁ କାମ ପାଇଁ ତା’ର ସ୍ୱାମୀ ଦାୟୀ ନୁହେଁ ବୋଲି । ସେ ତା’ ପୁଅ ପାଇଁ କ୍ଷୀର ଗରମ କରିବା ସମୟରେ ଗ୍ୟାସ ଲିକ ହୋଇ ଏହି ଅଗ୍ନି କାଣ୍ଡ ହୋଇଥିଲା ବୋଲି ସର୍ବ ସମ୍ମୁଖରେ ମନ୍ତବ୍ୟ ଦେଲା ।

ଏସବୁ ଭିତରେ ବହୁତ ବର୍ଷ ବିତି ଯାଇଛି । ସମୟ ଚକ୍ରରେ ସେ ଦୁର୍ଘଟଣା ର ଭୟାବହତା ମଧ୍ୟ ଆଜି ପ୍ରଶମିତ ହୋଇ ଯାଇଛି । ମଧୁମତିର ପୁଅ ଏବେ ବଡ ହୋଇଗଲାଣି , ସ୍କୁଲ ମଧ୍ୟ ଯାଉଛି । ମଧୁମତି ତା’ ପୁଅ ର କୁନିକୁନି ଆଖିରେ ସାରା ଦୁନିଆ ଦେଖିବାର ସ୍ୱପ୍ନ ଦେଖୁଛି । ଆଜିର ଶିକ୍ଷିତ ସମାଜ ଏତେ ବିକଶିତ ହେଲାପରେ ବି ନାରୀ ଏଠାରେ ସୁରକ୍ଷିତ ନୁହେଁ ।

କୁହନ୍ତୁ ତ, ମଧୁମତି ର କ’ଣ ଇଚ୍ଛା ନଥିବ କି , ସେ ଯାହାକୁ ବିବାହ କରିବା , ସେ ତା’ର ହାତ ଧରି ଆଜୀବନ ବାଟ ଚାଲିବ ବୋଲି , ଆଉ ଏକ ବିସ୍ତୃତ ଆକାଶ ତଳେ, ଏଇ ସବୁଜିମା ଧାରା ରେ ଗୋଟେ ସୁଖର ସଂସାର ଗଢିବା ବୋଲି । ହେଲେ ତା’ର ସ୍ୱପ୍ନ ଏ କଣ ପୁରା ହେଲା ? ତା’ର ଅପରାଧ କ’ଣ ? ସେ କଣ ପାଇଁ ଏତେ ଅବହେଳାର ଶିକାର ହେଲା ?

ମଧୁମତିର ଜୀବନ କାହାଣୀରୁ ଆମେ ଏହା ଶିକ୍ଷା ଲାଭ କଲୁ ଯେ, ଜୀବନ ସମସ୍ତଙ୍କ ପାଇଁ ସମାନ ନୁହେଁ ।

ବିଶେଷ ଦ୍ରଷ୍ଟବ୍ୟ:- ଏହି ଗଳ୍ପ କୈାଣସି କଳ୍ପନା ଆଧାରିତ ନୁହେଁ ସମ୍ପୂର୍ଣ୍ଣ ସତ୍ୟ ଘଟଣାବଳୀ ଉପରେ ଆଧାରିତ ।

Click to comment

Leave a Reply

Your email address will not be published. Required fields are marked *

ପ୍ରକାଶିତ ହୋଇଥିବା ଲେଖିକା/ଲେଖକଙ୍କ ତାଲିକା

ଲୋକପ୍ରିୟ ଲେଖା

To Top