ରଜଶ୍ଵଳା ମାଟିର କୁଆଁରୀ ଆକାଂକ୍ଷାରେ
ମହ ମହ ପହିଲି ଆଷାଢ଼
ଗର୍ଭଗୃହରେ ଶୂନ୍ୟବେଦୀରେ ସ୍ରଜନଶୀଳ ପ୍ରାୟ ଈଶ୍ୱର
ଶବ୍ଦଟେ କବିତା ପାଲଟିବାର ଅମୃତ ଅନ୍ଧାର
ଅବଶ୍ୟ ଆଲୁଅର ଚରାଚରରେ
ଅପେକ୍ଷାରତ ବାହାନଗାର ଦୁଃଖ
ଏବେ ଆପଣଙ୍କୁ ଡର ଲାଗିବ
ଶୁଣିବାକୁ ବୁଲେଟ ଟ୍ରେନ୍ର ଗପ
ଅବଶ୍ୟ ଆପଣ ବୁଝି ଯିବେଣି
ତେସ୍ତରୀ ବର୍ଷ ହେଲା ଆପଣଙ୍କୁ
ବେଶୀ ମିଛ କହିଛି ଗୋଟେ ସମ୍ବିଧାନ
ଉତୁରିନ ଥିବା ଗୁଡାଏ ପ୍ରଶ୍ନ ଏବେ ଆତଯାତ
ଧାନ ଗଛରେ କାହିଁକି ଏଠି ଲୁହ ଫଳେ ?
ପ୍ରେମର ଗଛରେ ପ୍ରତାରଣା ??
ଅମଲା ଗଛରେ ଦୋଳି ଝୁଲେ ???
ସରକାର ଗଛରେ ଝୁଲୁଥାଏ ପେନ୍ଥା ପେନ୍ଥା ଛଳନା ????
ସତକୁ ଗପ କରିଦେବାର ଅଦ୍ଭୁତ କଳା ଜାଣେ
ଆମର ଛଦ୍ମବେଶୀ ଗଣତନ୍ତ୍ର
ଈଶ୍ୱରଙ୍କୁ ଦାୟୀ କରି
ଏବେ ଚୁପ୍ ଚାପ୍ ଖସିଯିବ ବାହାନଗାର ହତ୍ୟାକାରୀ
କେନ୍ଦୁଝରର ମାଟି ସିଲଟ୍ରେ ଲେଖା ହେଉଥିବ
ଏବେ ଦାଦନ କାହାଣୀ
ଭୁବନେଶ୍ୱର ଲକର୍ରେ କଳାହାଣ୍ଡିର ମେଘ
ଗୋଟେ ଧଳା ଲୋକର ଇକରରେ
କାଳେ ବଦଳିଯିବ ରାୟଗଡାର ଭାଗ୍ୟ
ଦେଖାଯାଉ, ସବାଶେଷ ଲୋକକୁ କୋଉ ବରଦାନ ଦେବେ
ଶ୍ରୀମନ୍ଦିର ଆଗରେ ହୁଣ୍ଡି ଥୋଇଥିବା
ଅଦ୍ଭୁତ ଈଶ୍ୱର , ଦେଖା ଯାଉ …
ଆଶା ମୋର ଅନ୍ତାକ୍ଷରୀ
ତେସ୍ତରୀ ବର୍ଷ ହେଲା ଆପଣଙ୍କୁ
ବେଶୀ ମିଛ କହିଛି ଗୋଟେ ସମ୍ବିଧାନ
