ନିର୍ଜନ ରାତିରେ ବର୍ଷା ହେଲେ
ମୋ ଛାତି ଥରେ
ମନ କାନ୍ଦେ ବାହୁନି ବାହୁନି,
କ୍ୟାଣ୍ଟନ୍‌ମେଣ୍ଟ୍‌ ରୋଡ୍ ଭିଜିଲେ ବର୍ଷାରେ
ମୋ ଛାତି ଭିଜେ ମୋ ଆଖି ଲୁହରେ
ତା’ ଦୁଃଖ ଜମା ସହି ତ ହୁଏନି ।

କ୍ୟାଣ୍ଟନ୍‌ମେଣ୍ଟ୍‌ ରୋଡ୍‌ର ଛାତିସାରା
ପରାଜିତ ସୈନିକ ପରି
ମୁଣ୍ଡପୋତି ଛିଡ଼ା ହୋଇଥିବା ପାଟଳି ଗଛ ତଳେ
ଜମା ହୁଏ ପାକଲା ପତର,
ବର୍ଷା ଛିଟା ଖୋଲିଦିଏ
ତା’ ଛାତି ତଳେ ଲୁଚିଥିବା
ବାରବାଟୀ ଦୁର୍ଗର ହଜିଲା ପଥର,
ମୁଁ ଖୋଜେ ପୋଷ୍ଟାଲ୍ କଲୋନୀ ଆଗରେ
ଖୁଣ୍ଟପରି ଛିଡ଼ା ହୋଇଥିବା
ପୋଷ୍ଟବାକ୍ସ ଭିତରେ
କାଳେ ଭିଜୁଛି କି ମୋ ପାଇଁ ଲେଖାଥିବା
ମୋ ପ୍ରୀୟାର ପ୍ରଣୟ ପତର ।