କବିତା

ଚୁଟିଆ ମୂଷା

Rukeya Jabeen's odia poem Chutiaa Mooshaa

ଧରିବା, ମାରିବା ନୁହଁତ ସହଜ କଥା
ଡିଆଁ ମାରି ପଳାଏ ଦେଇଣ ବ୍ୟଥା,
ଚୁଟିଆ ମୂଷା ସେ କାମ ତାର ବିରାଟ,
ଛଟର ପଟର କରାଏ, ବଢ଼ାଏ ମୁଣ୍ଡ ବିନ୍ଧା ଅଯଥା ।

ଚୁଟିଆ ମୂଷା

ଡ଼ବା ପଛପଟେ କୁଟୁରୁ କାଟୁରୁ,
ଖଟତଳେ ଲୁଚି କରେ ଖୁସୁରା ଖାସୁରୁ,
ଢାଙ୍କୁଣୀ ଓଲଟି ପଡ଼େ ଧଡ଼ାକ, ତଡ଼ାକ,
ରୋଷେଇ ଘରେ କଲେ ସେ ଫୁସୁର ଫାସୁରୁ ।

ନଜର ପଡ଼ିଗଲେ ଚିକ୍କଣିଆ ପରିବାଟିଏ,
କେତେ କାରୁକାର୍ଯ୍ୟ ତା ଦେହେ ତୋଳିଦିଏ,
କୁନି କୁନି ସରୁ ସରୁ ଦାନ୍ତରେ ତାହାର,
ଅଲିଅଳି ଦରବକୁ କାଟିକୁଟି ସର୍ବନାଶ କରେ ସିଏ ।

କାଗଜ, କପଡ଼ା , ତୁଳା ତା’ ମନକୁ ପାଏ,
ସନ୍ଦି, କନ୍ଦି, ଅସନା ଟିକକ ଖୋଜୁଥାଏ,
ଦୃଷ୍ଟି ଆଢୁଆଳେ ଛୋଟିଏ ଜାଗାଟେ ଲୋଡ଼ା,
ଅନ୍ଧାର ଖେଳିବା ଯାଏଁ ସେ ଜଗି ବସିଥାଏ ।

ଧରିବା, ମାରିବା ନୁହଁତ ସହଜ କଥା
ଡିଆଁ ମାରି ପଳାଏ ଦେଇଣ ବ୍ୟଥା,
ଚୁଟିଆ ମୂଷା ସେ କାମ ତାର ବିରାଟ,
ଛଟର ପଟର କରାଏ, ବଢ଼ାଏ ମୁଣ୍ଡ ବିନ୍ଧା ଅଯଥା ।

ଲୋକପ୍ରିୟ ଲେଖା

To Top