ସରଗକୁ. . .
ଶିଡ଼ି ବାନ୍ଧିଦେବି ବୋଲି
କହିବାରୁ,
ପୋଡ଼ିଜଳି ପାଉଁଶ ପାଲଟିଗଲା
ସ୍ୱର୍ଣ୍ଣଲଙ୍କାପୁର ।
ଭାଙ୍ଗି ଚୂରମାର ହୋଇଗଲା
ଦଶାନନର,
ସକଳ ଐଶ୍ୱର୍ଯ୍ୟ, ଗର୍ବ, ଅହଙ୍କାର ।

ସୂଚ୍ୟଗ୍ରେ ମେଦିନୀ
ଦେବି ନାହିଁ ବୋଲି କହିବାରୁ
ଛିଡ଼ିଗଲା, କୌରବ କୂଳର
ଯେତେ ସବୁ ଚେର ମୂଳ ।
ଭାଙ୍ଗିଗଲା, ମହାମାନୀ ଦୁର୍ଯ୍ୟୋଧନର
ପ୍ରଚଣ୍ଡ ଶୌର୍ଯ୍ୟ ଆଉ. . .
ଦମ୍ଭର ହସ୍ତିନାପୁର ସିଂହାସନ ।

ବନ୍ଦୀଶାଳାର ଲୌହ କବାଟ
ଫିଟିବ ନାହିଁ ବୋଲି
କହିବାରୁ, ଖୋଲିଗଲା. . .
ପ୍ରବଳ ପ୍ରତାପୀ କଂସର
ସବୁତକ ମୃତ୍ୟୁର ରୁଦ୍ଧଧାର ।