ଭାଇନା
ପ୍ରେମରେ ବାଜି ଜିତିବା ଅର୍ଥ
ପରାଜୟ ପାଇଁ ପ୍ରସ୍ତୁତ ହେବା ।

ଫୁଟା କଳସୀଟି ଘରକୁ ନେଲ ଯେ
ଏବେ ଲହଡ଼ା ମାରୁଚି ପାଣି ଦାଣ୍ଡସାରା
ନାଁ ଛାଡ଼ି ପାରୁଚ ପାଣିପିଆ
ଭାଙ୍ଗିପାରୁଚ ମାଠିଆ ।

ଏଇ କଳସୀ ଜିଣିବା ପାଇଁ
କେତେ ଯନ୍ତର ମନ୍ତର ନ କଲ ଭାଇନା ।
କଲେଜ କାନ୍ଥରେ ନିଜ ନାଁ ଲେଖିଲ ଅଙ୍ଗାରରେ
ତମ ନିରବ ପ୍ରତିପକ୍ଷଙ୍କୁ
ନୀଳହତ୍ୟା କଲ ଜହ୍ନରାତିରେ
ଏବେ ତମ ଘରବୁଡ଼ି ପାଣି ଆଣ୍ଠୁଏ
କଳସୀ କାଖେଇ ବୁଲୁଥା’ ।

ଯାହା କହୁଛ କୁହ
ସିଏ କିନ୍ତୁ ତୁମର ନୁହଁ ।
ତା’ ଆଖିକୁ ଦେଖୁନ
ସାଇତିଛି ଅନେକ ପ୍ରେମିକଙ୍କ ଆଲବମ୍
ଓଠକୁ ଦେଖ
ମାତାଲ ପ୍ରେମିକଙ୍କ ଚୁମାରେ
ଚିତ୍ରମୟ ଦିଶୁଚି ମଧୁଶାଳା ।
ଏମିତିକି ସ୍ତନ, ନାଭି, କଟି ଓ ପିଠିରେ
ସବୁଠି ପ୍ରେମିକମାନଙ୍କ ଚୁମା ଚିହ୍ନ
ତମେ କେଉଁଠି ପାଦ ଥୋଇବ
ଅଛି ଶୂନ୍ୟସ୍ଥାନ ?