ମୁହଁ ଶୁକେଇ ବସିଚି ବିଲ
ଆକାଶରେ ଆଉ ମେଘ ନାହିଁ
ମାଟିତଳକୁ ଖସିଯାଉଚି ଜଳ
ପାଣି ବିନା ହୋଇପାରୁନି ଚାଷ ଅନୁକୂଳ ।
ମାଟିର ମହାଯୋନିରେ
ହଳଲଙ୍ଗଳର ରମଣର ବାସ୍ନା ଏବେ କାହିଁ ଯେ !

ମୁହଁ ଶୁକେଇ ବସିଚି ବିଲ
ଗୋଟାଏ ଦସ୍ତଖତରେ
ବିକ୍ରି ହୋଇଗଲା ପରେ ମାଲିକାନା
ଏବେ ଏଠି କାରଖାନାର ତୂରୀ ବାଜିବ
ଫୁଲ, ଫଳ, ଗୋରୁପଲ ବଦଳରେ
ତତଲା ତାୱାର କୋକେଇରେ
ତରଳିଯିବ ମାଟିର ମସୃଣ ମଲାଟ ।

ଆଉ ମୁହଁ ଶୁକାନା ତୁ
ଏବେ ମୁଠାଏ ମାଟି
ପାପୁଲିଏ ପାଣି ଦେଖିଲେ
କହିବାକୁ ପଡ଼ିବ
ହେଇ ବିଲ, ବିଲ, ବିଲ
ମାଟି ଅଛି ତ
ଫୁଟୁଥିବ ଫୁଲ !