ବାରିପଦାର ଗରମ ମୁଢ଼ି
ଢେଙ୍କାନାଳର ବରା ।
ଠୁଙ୍କାପୁରୀରେ ମନ ଯଦିରେ
ଚାଲ ବାଲି ଯାତରା ।।

ସାଲେପୁରର ରସଗୋଲାକୁ
ପାରିବ କିଏ ଭୁଲି ?
ରସାବଳି କି ପୋଟଳି ଖାଅ
କେନ୍ଦ୍ରାପଡ଼ାରେ ବୁଲି ।।

ପୁରୀକୁ ଚାଲ ଖାଇବ ଯଦି
ମହାପ୍ରସାଦ, କ୍ଷୀରା ।
ଦୁଧ ଛେନାରେ ରାବିଡ଼ି ପରା
ଭୁବନେଶ୍ୱର ହୀରା ।।

ବ୍ରହ୍ମପୁରରେ ଖାଇବା ଚାଲ
ଚାରୁ ଚଟଣି ଚହ୍ଲା ।
ପାରାଦ୍ୱୀପର ପ୍ରନ୍ କଟ୍ଲେଟ୍
କେଡ଼େ ସୁଆଦ ଭଲା ।।

ଚାଟ୍, ଦହିବରା, ଆଳୁଦମ୍
ପାଇବ ଆଉ କାହିଁ ?
କଟକ ଚାଲ ଖାଇବା ମଜା
କାହିଁ ମିଳିବ ନାହିଁ ।।

ଗାଁରେ ଭଲ ପଖାଳ ସାଥେ
ଚଟଣି, ଶାଗ ଭଜା ।
ଶୁଖୁଆ ପୋଡ଼ା, ବଡ଼ିଚୁରାଟି
କେମିତି ଲାଗେ ମଜା ।।

ବାଇଗଣକି ଆଳୁପୋଡ଼ାରେ
ରସୁଣ, ଲଙ୍କା ପଡ଼ି ।
ଚକ୍‌ଟା ଯଦି ଅଛିରେ ଭାଇ
ଲାଳ ଆସୁଛି ଗଡ଼ି ।।

ପତର ପୋଡ଼ା ବେସର ଗୋଳା
ଚୁନାମାଛର ଟେଷ୍ଟ୍ ।
ଜାଣିଛି ଯିଏ କହିବ ନିଶ୍ଚେ
ଇଏ ହେଉଛି ବେଷ୍ଟ୍ ।।