ମୁଁ ପ୍ରକୃତି, ସୃଷ୍ଟି, ଧରିତ୍ରୀ
ଈଶ୍ୱର ଅଭିପ୍ରେତ
ଧରିବାକୁ ଧରା ।

ପବନର ଆବଶ୍ୟକତା
ଆକାଶର ବ୍ୟାପ୍ତି
ସାଗରର ଗଭୀରତା
ମାଟିର ସହନଶୀଳତା
ଓ ଅଗ୍ନିର ତେଜ ମୁଁ ।

ମୁଁ ହିଁ ରଙ୍ଗ ମାଖେ
ସାରା ସଂସାରରେ
ମୋ ପ୍ରେମର ରଙ୍ଗରେ ।

କେତେବେଳେ ଗର୍ଭ ଯନ୍ତ୍ରଣା ସହେ
ଜନ୍ମ ଦିଏ ତାକୁ
କେବେ ତା’ ବାଳୁତପଣର ଦୁଷ୍ଟାମିକୁ
ଫ୍ରକ୍ କୁଞ୍ଚରେ ଲୁଚେଇ ହୁଏ ଭଉଣୀ
ତା’ ଆଖିରେ ମାଖିଦିଏ
ସ୍ୱପ୍ନର ଅଞ୍ଜନ
ଛାତିରେ ଶୁଭେ ହୋଇ
ମଧୁର ଗୁଞ୍ଜନ
ମୁଁ ଯେବେ
ପ୍ରେମିକା ହୁଏ ।

ତା’ର ସବୁ ଅଭାବ ମେଣ୍ଟାଏ
ସହଧର୍ମିଣୀ ହୋଇ
ବନ୍ଧୁଟିଏ ହୋଇ
ତା’ ହାତ ଧରି ଚାଲେ
ପାରି କରିଦେବାକୁ କଣ୍ଟକିତ
ଓ ବନ୍ଧୁର ରାସ୍ତା ।