ଅଯାଚିତ ଦାନ ତୁମ୍ଭର ହେ ପ୍ରଭୁ ,
ଏ ବିଶ୍ୱ ଜୀବ ଜଗତ ।
ପରମ ଭାବରେ ପ୍ରତିଟି ହୃଦୟେ ,
ଅପ୍ରକାଶେ ବିରାଜିତ ।
ନଭୋ , ଜଳ ସ୍ଥଳ ପାହାଡ଼ ଜଙ୍ଗମ,
ସବୁଠିଁ ତୁମ୍ଭର ସ୍ଥିତି ।
ତୁମ୍ଭ ବ୍ୟତିରେଳେ ଏ ଜୀବନ ରଥ ,
ସାରଥୀ ବିନୁ ପ୍ରଗତି ।
ପ୍ରକାଶିତ ହୁଅ ହୃଦ ଶ୍ରୀମନ୍ଦିରେ ,
ଦିବ୍ୟତ୍ୱର ଆଭା ନେଇ ।
ଭକତି ପ୍ରେମରେ ପବିତ୍ର ଜଳରେ ,
ପୂଜିବୁ ନିଷ୍କାମ ହୋଇ ।
ସତ୍ୟର ଦୟଣା ଶ୍ରୀଭୂଜେ ଅରପି ,
ସତ୍ୟର ପୂଜାରୀ ସାଜି ।
ଶରଧା ସୁମନେ ଚନ୍ଦନ ଚର୍ଚ୍ଚିତ,
କରିବୁ ଶ୍ରୀଅଙ୍ଗ ରାଜି ।
ଦୟା ଆଭୂଷଣେ ଏକତା ସୂତ୍ରରେ ,
ସୁଗନ୍ଧିତ ପୁଷ୍ପ ମାଳେ ।
କ୍ଷମାର ସାଗରେ ଆରତୀ ଅର୍ପିବୁ,
ଅହିଂସା ସ୍ତବଳ ତାଳେ ।
ପ୍ରିୟ ସୁଦର୍ଶନ ରୂପୀ ସମର୍ପଣ,
ସମର୍ପୁଛୁଁ ଶ୍ରୀଚରଣେ ।
ବିଶ୍ବ ନିୟନ୍ତାଙ୍କ ଦିବ୍ୟ ସ୍ୱରୂପକୁ,
ସମୁରୁଥାଉଁ ଅନୁକ୍ଷଣେ ।
