ଆପଣଙ୍କ ବ୍ରାଉଜରରେ ଏହି ସୁବିଧା ଉପଲବ୍ଧ ନାହିଁ।
କାଳର ଚିତ୍ରିତ କଳସୀ
ଭାସି ଭାସି ଯାଏ
ଜୁଆରିଆ ନଈ ମୁହାଣରେ
ଭଉଁରୀ ଖେଳୁ ଖେଳୁ
ଲହରୀର ହାତ ଧରି ଟାଣିନିଏ ସମୁଦ୍ର
କୂଳରେ ପଡ଼ିରହେ କଳସୀ
ପୋଡ଼ା କାଠ, ଅଙ୍ଗାର, ଫୁଲ, ଆମ୍ୱଡ଼ାଳ
ଏବଂ କନିଷ୍କର ଶବ
ଚିତ୍ରିତ କଳସୀର ରଙ୍ଗ ପାଣିଚିଆ ହୋଇଯାଏ ।
ଆକାଶର ସିଲ୍ହଟ୍ରେ ଗାର ଟାଣୁଥାନ୍ତି
ବେଳାଭୂମିର ଅପାଂକ୍ତେୟ ଗଣ
ଅପେକ୍ଷା ରଖି ପୂର୍ଣ୍ଣିମା ଚାନ୍ଦର
ଅଝାଲଟାଣି ନାଉରିଆ ଭିଡୁଥାଏ କାତ
କଣ୍ଠରେ ଦୋହରାଇ
ବାଉଲ୍ର ଉଦାତ୍ତ ସଙ୍ଗୀତ ।।
