ସକାଳେ ଯେବେ ସୁରୁଜ ଆସେ
ଜହ୍ନ ମାମୁଁ ଯାଇ କୁଆଡ଼େ ଲୁଚେ
ମିଟି ମିଟି ତାରା କେତେ ଯେ ଥିଲେ
ଦିନ ନ ହେଉଣୁ କୁଆଡେ ଗଲେ ?
ଆକାଶ କାହିଁ ମା ନୀଳ ଦିଶେ
ସୁରୁଜ କାହିଁ ସଦା ପୁରୁବେ ଆସେ
କୁଆଡେ ଯାଏ ସେ ସୁରୁଜ ନନା
ନୀତି ସଞ୍ଜରେ ମାଆ କହନା
ନଦୀରେ କିଏ ଢାଳୁଛି ପାଣି
କେତେ ଯେ ବହୁଛି , ଜମା ସରୁନି
ପାହାଡ଼ରେ କିଏ ପୋତିଛି ଗଛ
କାହାର ସେଥିକୁ ପାଇଛି ହାତ ?
ଆକାଶ ମିଶିଛି ମାଟିରେ ଯାଇଁ
କେତେ ଦୂର ମା କହ ସେ ଭୂଇଁ
ଚାଲ ଯିବା ଆମେ ଆକାଶ ଛୁଇଁ
ଚାଲ ଯିବା ଆମେ ଆକାଶ ଛୁଇଁ
