ଭାରତ ମାଆର କୋଳେ ଜନମିଲ
ହୋଇ ତୁମେ ସୁନାପୁଅ
ଖୋଲିଦେଲ ତାର ପରାଧୀନ ବେଡି
ପୋଛିଦେଇ ଆଖି ଲୁହ ।୧।

ଦୁନିଆରେ ରଖି ଏଇ ମାଟି ଟେକ
ଦୁଃଖ ବେଦନାକୁ ହରି
କାଳକାଳ ପାଇଁ ହୋଇଲ ଅମର
କରମ ସାଧନା କରି ।୨।

ଅଠରଶ ଅଣସ୍ତରି ବରଷର
ଅକ୍ଟୋବର ଦିନ ଦୁଇ
ପରିବାର ଲୋକେ ହୋଇଥିଲେ ଖୁସି
ଶିଶୁ ମୋହନଙ୍କୁ ପାଇ ।୩।

ତୁଳସୀର ପରି ଦୁଇପତ୍ରୁ ବାସି
ଥିଲ ତୁମେ ବାଲ୍ୟକାଳେ
ଭଲକାମ କରି ଭଲବାଟେ ଯାଇ
ହେଲ ବଡ଼ ମହୀ ତଳେ ।୪।

ବିଲାତ ଦେଶକୁ ଯାଇ ପଢ଼ିଥିଲ
ଜଟିଳ ଆଇନ ପାଠ
ଓକିଲାତି କରି ଅନେକ ମାମଲା
ପାଇଁ ଦେଖାଇଲ ବାଟ ।୫।

ଦକ୍ଷିଣ ଆଫ୍ରିକା ଦେଶେ ଯାଇ ତୁମେ
କରିଥିଲ ଓକିଲାତି
ମାମଲାରେ ଜିତି ଦେଇଥିଲ ଜାଳି
ବିପ୍ଲବର ଦିବ୍ୟ ଜ୍ୟୋତି ।୬।

କଳାଗୋରା ଭେଦଭାବ ବିରୋଧରେ
କରିଲ ବହୁତ କାମ
ମୁକତିର ପଥ କରି ପ୍ରଦର୍ଶନ
ଅରଜିଲ ସେଠି ନାମ ।୭।

ନୀଳଚାଷୀଙ୍କର ହିତ କରିବାକୁ
ଚମ୍ପାରଣ ବିହାରରେ
ପୁଣି ଦାଣ୍ଡି ଠାରେ କଲ ସତ୍ୟାଗ୍ରହ
ଲୁଣ କର ବିରୋଧରେ ।୮।

ଜନମ ମାଟିରେ ରାମ ରାଇଜର
ସପନ ଯେ ଦେଖିଥିଲ
“କୁଟି ଖାଇ କାଟି ପିନ୍ଧ” ଦେଶ ଭାଇ
ମହାମନ୍ତ୍ର ଦେଇଥିଲ ।୯।

ଫିରିଙ୍ଗି ଜିନିଷ ତ୍ୟାଗ କରିବାକୁ
ଦେଇଥିଲ ତୁମେ ଶିକ୍ଷା
ସ୍ବଦେଶୀ ଜିନିଷ ଉତ୍ପାଦନ କରି
ବ୍ୟବହାର ପାଇଁ ଦୀକ୍ଷା ।୧୦।

ଖଦି ଗ୍ରାମୋଦ୍ୟୋଗ ଶିଳ୍ପର ବିକାଶ
ନିମନ୍ତେ କରି ଉଦ୍ୟମ
ସ୍ଵଛ ପରିଷ୍କାର ଦେଶ ଗଢ଼ିବାକୁ
କରିଗଲ ଭଲ କାମ ।୧୧।

ଦେଶେ ନାରୀଙ୍କର ଦୁଃଖ ଅବହେଳା
ଗରିବୀର ହାହାକାର
କରିଲ ପ୍ରୟାସ ଦୂର କରିବାକୁ
ଅସ୍ପୃଶ୍ୟତା କୁସଂସ୍କାର ।୧୨।

ସୁନ୍ଦର ସମାଜ ପରିବାର ପଥେ
ଶତ୍ରୁ ଅଟେ ନିଶାପାନ
ଶିଖାଇଲ ନିଶା ଛାଡିଦେଇ ବଞ୍ଚ
ସୁସ୍ଥେ ଦେଶବାସୀ ଜନ ।୧୩।

ବିଦେଶୀ ଶାସନ ହଟାଇବା ପାଇଁ
କରିଥିଲ ମନେ ପଣ
ଅହିଂସା ସତ୍ୟର ପଥ ଅନୁସରି
ଲଢ଼ି ସ୍ୱାଧୀନତା ରଣ ।୧୪।