ଆପଣଙ୍କ ବ୍ରାଉଜରରେ ଏହି ସୁବିଧା ଉପଲବ୍ଧ ନାହିଁ।
ଝରା ବଉଳର
ସପନ ଅସରା ଅସରା
ଝୁରା ହୃଦୟର କବିତା,
ଝର ଝରଣାର
କାଚକେନ୍ଦୁ ଜଳେ
ତୁମେ ମୋ ବନପରୀ ଜ୍ୟୌସ୍ନା ସ୍ନାତା ।
ଧୀର ସମୀରର
ସଂଗୀତ ସୀତ୍କାରେ
ନବ ମେଘମାଳା ଲୀଳାୟିତା,
ପ୍ରଥମ ଆଷାଢ଼
ଚୁମ୍ୱନ ଆଶ୍ଲେଷେ
ମୋ ମୌସୁମୀ ପ୍ରିୟା ମନ୍ଦାକ୍ରାନ୍ତା ।
ସଖୀ – ତୁମେ
ମେଘମାଳା ମୋର
ମୋ ହୃଦ ଆକାଶ କଜ୍ଜଳ ଆଭା,
ସଖୀ – ତୁମେ
ମୋ ମୋସୁମୀ ପ୍ରିୟା
ମୋ ଆଷାଢ଼ ନଭର କିଶୋରୀ ବିଭା ।
ଝରି ଯାଅ ଆଗୋ
ଭିଜାଇ ଦିଅ ମୋ
ଚାତକ ତୃଷ୍ଣା – ଭିଜା ହୃଦବେଳା,
ଭିଜାଇ ଦିଅ ମୋ
ମନ ତଟଦେଶ
ଆଗୋ ମୋ ମେଘମାଳା ।
